‘संगठन संरचना दरबन्दी तेरिज’ मन्त्रिपरिषदबाट स्वीकृत

१६ असोज, हेटौंडा । बागमती प्रदेश सरकारले  ‘संगठन संरचना दरबन्दी तेरिज’ स्वीकृत गरेको छ । मन्त्रिपरिषद् बैठकले प्रदेशका विभिन्न ६ वटा निकायमा रहेका कर्मचारीहरुको दरबन्दी तेरिज स्वीकृत गर्ने निर्णय गरेको हो ।  
सरकारका प्रवक्ता समेत रहेका कानुन मन्त्री गंगा नारायण श्रेष्ठले क्रमिक रुपमा प्रदेशका अन्य मन्त्रालय र निकायहरुको पनि दरबन्दी तेरिज तयार गरी स्वीकृत गरिने बताए । ‘प्रदेश सरकार स्थापनापछि निर्माण भएका विभिन्न २१ वटा निकायको अस्थायी दरबन्दीलाई स्थायी गर्ने प्रक्रिया अघि बढाउन कर्मचारीहरुको दरबन्दी तेरिज स्वीकृत गरेका छौं । प्रदेश संरचनालाई बलियो बनाउन यो निर्णय थप प्रभावकारी हुने सरकारको विश्वास छ,’ उनले भने । 
मन्त्री श्रेष्ठले प्रदेशमा रहेका अस्थायी दरबन्दीहरु प्रदेश किताबखानामा दर्ता भइ स्थायी रुपमा पदपूर्तिका लागि प्रदेश लोक सेवा आयोगले काम गर्ने पनि जानकारी दिए । 
यसैगरी बैठकले ‘हस्तकला ग्राम स्थापना तथा सन्चालन गर्न बनेको बिधेयक २०८०’ प्रदेश सभामा पेश गर्न सहमती प्रदान गर्ने निर्णय गरेको छ । सोमबार बसेको मन्त्रिपरिषद बैठकले उक्त बिधेयक प्रदेश सभामा पेश गर्न सहमती प्रदान गर्ने निर्णय गरेको सरकारका प्रवक्ता एवं आन्तरिक मामिला तथा कानुन मन्त्री गंगानारायण श्रेष्ठले जानकारी दिए । 
यसअघि अध्यादेशबाट जारी भएको उक्त विधेयक सरकारले पुनः विधेयकका रुपमा संसद पठाउने तयारी गरेको हो । प्रदेश सरकारले गत २०७९ भदौ मै हस्तकला ग्राम स्थापना तथा सन्चालन सम्बन्धमा अध्यादेश जारी गरी कार्यान्वयनमा ल्याएको थियो । तर, संसद सञ्चालनको ६० दिनसम्ममा पनि सो अध्यादेश प्रतिस्थापन हुन नसकेपछि फेल भएको थियो । 
यस्तै बैठकले प्रदेश सुशासन केन्द्र स्थापना तथा कार्य संचालन आदेश २०७७ संशोधन गर्ने, प्रदेश प्रशिक्षण विधेयक तर्जुमाको सैद्धान्तिक स्वीकृति प्रदान गर्ने र चलचित्र विधेयक तर्जुमाको सैद्धान्तिक स्वीकृति प्रदान गर्ने निर्णय पनि गरेको छ ।