बाराही माविलाई भीमफेदीले दियो स्कुल बस

१८ असोज, हेटौंडा । मकवानपुरको भीमफेदी गाउँपालिका ४ नम्बर वडामा रहेको बाराही माध्यमिक विद्यालयलाई भीमफेदी गाउँपालिकाले  विद्यालय बस सहयोग गरेको छ । 
गाउँपालिकाका अध्यक्ष हिदम लामा र उपाध्यक्ष सञ्जीव श्रेष्ठको उपस्थितमा एक कार्यक्रमकाबीच विद्यालयलाई बस हस्तान्तरण गरेको हो । 
भीमफेदी गाउँपालिकाको ३० लाख रुपैयाँ आर्थिक सहयोगमा बस सेवा सुरु गरिएको विद्यालय व्यवस्थापन समितिका अध्यक्ष रमेश आचार्यले जानकारी दिए । 
साविक निबुवाटार गाविस हाल भीमफेदी गाउँपालिका वडा नम्बर ३ र ४ गरी दुइवटा वडा बनाइएको छ । दुईवटै वडाको लागि माध्यमिक तहको स्कुल भने बाराही माध्यमिक विद्यालय मात्र रहेको छ । 
उनले भौगोलिक हिसाबले विकट भएकोले स्थानीय अभिभावक र विद्यालयको माग बमोजिम गाउँपालिकाका अध्यक्ष लामा र उपाध्यक्ष श्रेष्ठको विशेष पहलमा विद्यालय बसको ब्यवस्था भएको बताए । 
गाउँपालिका अध्यक्ष लामाले अध्यापन गर्न आउने विभिन्न ठाउँका  विद्यार्थी भाइबहिनीलाई सजिलो बनाउनको लागि बसको ब्यवस्था गरेको बताए । लामाले सबै अभिभावकलाई आग्रह गर्दै अब सरकारी विद्यालयमै गुणस्तरीय शिक्षा प्रदान हुने भएकोले निर्धक्क भएर आफ्ना नानीबाबुलाई विद्यालय पठाउन अनुरोध गरे । 
कार्यक्रममा वडा अध्यक्षहरूका सागर पाण्डे, जहार सिं लामा, काशिराम बज्यु, प्रकाश पुडासैनी, विद्यालयका प्रधानाध्यापक दुर्गाप्रसाद गौतमलगायतको आतिथ्यता थियो ।