हेटौंडाका अधिकांश पुर्नस्थापना केन्द्र मापदण्ड विपरित

२० असोज, हेटौंडा । मकवानपुरमा लागूऔषध प्रयोगकर्ताहरुको लागि सञ्चालनमा रहेका अधिकांश पुनस्र्थापना केन्द्र मापदण्ड विपरित रहेको पाइएको छ । 
जिल्ला प्रशासन कार्यालयको अगुवाईमा सरोकारवाला निकायले गरेको अनुगमनको क्रममा मापदण्ड अनुसार सञ्चालनमा नरहेको पाइएको हो । अनुगमन टोलीले जिल्लाको ७ वटा पुनस्र्थापना केन्द्रको अनुगमन गरेको हो । 
‘अधिकांश पुनस्र्थापना केन्द्रमा जग्गाको मापदण्ड नपुगेको पाइएको छ’, मकवानपुरका सहायक प्रमुख जिल्ला अधिकारी झरेन्द्रप्रसाद चापागाईंले भने, ‘पुनस्र्थापना केन्द्रमा भौतिक संरचना र जग्गाको अभाव देखिएको छ । सरकारी प्राथमिकता समेत कम भएको पाइएको छ । सुधार गर्नुपर्ने कुरा धेरै छन् ।’ 
मापदण्ड नपुगेका सुधार केन्द्रलाई अनुगमन टोलीले सुधारका लागि सुझाव समेत दिएको छ । प्राय ः सुधार केन्द्रमा भान्सामा खानाको तालिका नबनाएको, पुस्तकालय नभएको पाइएको सहायक प्रजिअ चापागाईंले जानकारी दिए । 
सञ्चालकलाई समयानुकुल तालिम दिनुपर्ने आवश्यकता देखिएको बताइएको छ । मकवानपुर लागूऔषध उत्पादन, सेवन तथा ओसारपसारमा अग्रस्थानमा रहेको छ । जिल्लाका सबै सुधार केन्द्रमा लागूऔषध प्रयोगकर्ताहरुको भीड नै रहेको छ । 
स्थानीय तहमा एउटै वडामा धेरै उपचार तथा पुनस्र्थापना केन्द्रलाई अनुमति दिनु भन्दा एउटा मात्रै व्यवस्थित बनाएर सञ्चालन गर्नुपर्ने चापागाईंको सुझाव छ । 
अनुगमन टोलीले हेटौंडा १५ मा रहेको ब्रीज अफ होप, हेटौंडा ८ को सुरुवात, ८ मै रहेको साहारा समूह, ९ नम्बर वडामा रहेको सिआन पुर्नस्थापना केन्द्र र पिरु फाउण्डेसन, ४ नम्बर वडामा रहेको मकवानपुर रिकभरिङ समूह तथा ११ नम्बर वडाको निता फाउण्डेसनमा अनुगमन गरेको हो । 
अनुगमन गरिएकोमध्ये रिकभरिङ समूहमा सबै राम्रो भएको अन्यले भने सुधार गर्नुपर्ने अवस्था रहेको अनुगमन टोलीको सुझाव छ ।