मकवानपुरको कैलाशमा आगोमा पेट्रोल खन्याउदा भोलन जलेर घाइते 

२४ असोज,हेटौँडा । मकवानपुरको कैलाशमा आगोमा पेट्रोल खन्याउदा लुगामा सल्केको आगोले पोल्दा एक युवक जलेर गम्भीर घाइते भएका छन् ।  बुधबार  मकवानपुरको कैलाश गाउँपालिका वडा नम्बर १० भवङमा स्थानीय २३ बर्षीय हिक्मत भोलनले आफ्नै घरबाट १०० मिटरमा रहेको करेसा बारीमा साथीहरु १७ बर्षीय एक युवक (नाम परिवर्तनं),२३ बर्षीय सागर थिङ र अन्दाजी २२/२३ बर्षीय नरेश थिङ सहित दाउरा बालेर आगो ताप्ने क्रममा २३ बर्षीय हिक्मत भोलनलाई आगोले पोल्दा जलेर गम्भीर घाइते भएको मकवानपुरका  प्रहरी प्रवक्ता प्रहरी नायव उपरीक्षक लक्ष्मी भण्डारीले जानकारी दिएका छन् । 

१७ बर्षीय नाम परिवर्तन युवकले  साथिहरुसँगै  रहेको समयमा बलिरहको रहेको आगोमा प्लाष्टिकको बोतलबाट पेट्रोल खनाउदा २३ बर्षीय भोलनले लगाएको कपडामा अचानक आगो सल्किदा कम्मर भन्दा मुनिको भाग पुरै जली घाईते भएको जनाइएको छ । भोलनको उपचारको लागि हेटौडा अस्पताल ल्याइएको, उपचार सम्भव नभएपछि थप उपचारको लागी काठमाण्डौ किर्तिपुर रिफर गरिएको जनाइएको छ । मकवानपुर प्रहरी प्रवक्ता भण्डारीले घटना मंगलबार बिहानको भएको तर जानकारी बुधबार दिउँसो मात्र प्रहरीलाई प्राप्त भएको जनाएका छन् ।