मनहरीको पशुपति मा वि मा विद्यार्थी टिकाउन साइकल वितरण

२५ असोज,हेटौँडा । मकवानपुरको मनहरी गाउँपालिकाको एक विद्यालयले विद्यालयमा विद्यार्थीलाई नियमित गराउने वातावरण बनाइराख्न र बीचैमा पढाइ छाड्ने प्रवृत्ति अन्त्यका लागि विद्यार्थीहरुलाई साइकल वितरण गरेको छ । 
मकवानपुरको मनहरी गाउँपालिका वडा नम्बर ४ मसिनेमा रहेको पशुपति माध्यमिक विद्यालयले कक्षा ६ देखि १० सम्म अध्ययन गर्ने ११५ जना विद्यार्थीहरुलाई साइकल प्रदान गरेको हो । विद्यालयमा बिहिबार एक कार्यक्रमको आयोजना गर्दे विद्यार्थीहरुलाई साइकल वितरण गरेको हो । बागमती प्रदेशका सामाजिक विकासमन्त्री कुमारी मोक्तानले विद्यार्थीलाई साइकल वितरण गरेकि हुन् । साइकल मनहरी गाउँपालिका वडा नम्बर ४ को आर्थिक सहयोगमा खरिद गरेको विद्यालयका प्रधानाध्यापक भानुभक्त आचार्यले जानकारी दिएका छन्।साइकल वितरण कार्यक्रममा बोल्दै मन्त्री मोक्तानले विद्यालयले विद्यार्थीका लागी साइकल वितरण गरेर प्रशंसनिय काम गरेको उल्लेख गर्दै बिचैमा विद्यालय छाड्ने समस्यामा कमि आउने कुरामा आफु ढुक्क रहेको सुनाईन । उनले ग्रामिण क्षेत्रका विद्यालयहरुमा विद्यार्थी भर्ना बढाउने र टिकाई राख्नका लागी प्रदेश सरकारकारले पनि सहयोग पु¥याउँने प्रतिवद्धता व्यक्त गरिन् । 
यता विद्यालयका प्रधानाध्यापक भानुभक्त आचार्यले ४ नम्बर वडाका वडाध्यक्ष प्रकाश थापाको अगुवाइमा प्राप्त १० लाख रुपियाँ बजेटबाट साइकल वितरण गरिएको बताएका छन्।प्रधानाध्यापक आचार्यले साइकल वितरणले बनकरिया समुदायका विद्यार्थी अध्ययन गर्ने विद्यालयमा विद्यालय आउजाउ गर्न एक घण्टाभन्दा बढी पैदल हिँड्नु पर्ने बाध्यतमक अवस्थाको अन्त्य हुने कुरामा आशावादी रहेको बताए । विद्यालय ब्यवस्थापन समितिका अध्यक्ष माधब गौतमको सभाध्यक्षतामा भएको कार्यक्रममा गाउँपालिका शिक्षा प्रमुख प्रदीप पराजुली, पूर्ववडाअध्यक्ष ध्रुब खड्का, विद्यालय व्यवस्थापन समिति पूर्वअध्यक्ष रामहरि बिष्ट लगायतको उपस्थिती रहेको थियो ।