सिद्धार्थमा नव आगन्तुक विद्यार्थीलाई स्वागत र दशै बिशेष कार्यक्रम 

२६ असोज,हेटौंडा । हेटौंडा–२ मा रहेको सिद्धार्थ माध्यमिक विद्यालयमा कक्षा–११ मा अध्ययनका लागि आएका नव आगन्तुक विद्यार्थीलाई स्वागत गर्दै दशै विशेष कार्यक्रमको आयोजना गरिएको छ । नजिकिदै गरेको नेपालीको महान पर्व वडादशैको अवसरमा चियापान तथा शुभकामना आदान–प्रदान तथा कक्षा–११ मा भर्ना भएका नव आगन्तुक विद्यार्थीलाई स्वागत गरिएको हो । कक्षा–१२ का विद्यार्थीको आयोजनामा भएको कार्यक्रममा विद्यालय व्यवस्थापन समितिका अध्यक्ष बलराम घिमिरेको प्रमुख आतिथ्यता रहेको थियो ।

विद्यालयका बाल क्लब अध्यक्ष भोजराज संजेलको सभाध्यक्षतामा भएको कार्यक्रममा विद्यालय व्यवस्थापन समितिका सदस्यहरु पिताम्बर बास्तोला,रामचन्द्र बर्तौला,लक्ष्मी श्रेष्ठ, सरिता दाहाल, विद्यालयका प्रअ मोहन प्रसाद शर्मा,सहायक प्रअ रामशरण अधिकारी, कक्षा११÷१२ संयोजक गणेश प्रसाद हुमागाई,खुल्ला विद्यालय संयोजक खेमराज लामिछाने लगायतले मन्तव्य व्यक्त गरेका थिए । कार्यक्रममा विद्यालयका शिक्षक,कर्मचारीहरुको सहभागिता रहेको थियो । प्रेक्षा तिम्लसिनाले संचालन गरेको कार्यक्रममा विद्यार्थीहरुले नृत्य प्रस्तुत गरेका थिए भने टिका तथा कलम दिएर नव आगन्तुक विद्यार्थीलाई स्वागत गरिएको थियो । नव आगन्तुक विद्यार्थीलाई स्वागत गर्ने परिपाटीको निरन्तरताका लागि कार्यक्रमको आयोजना गरिएको कार्यक्रम संयोजक प्रतिमा गौतमले बताइन्।