मनहरी-७ नम्बरको वडाको आफ्नै भवन, ईन्द्र बानियाँद्वारा उद्घाटन

वडा कार्यालयको भवन उदघाटन गर्दै बानियाँ

२८ असोज,हेटौँडा । मनहरी गाउँपालिका वडा नम्बर ७ को नवनिर्मित वडा कार्यालय भवनको आईतबार उद्घाटन गरिएको छ। मनहरी-७ बिजौनामा बनेको नवनिर्मित वडा कार्यालय भवनको बागमती प्रदेशसभा सदस्य तथा कांग्रेस बागमती प्रदेश सभापति ईन्द्र बहादुर बानियाँले उद्घाटन गरेका हुन् ।

वडा कार्यालय नवनिर्मित भवनको उद्धघाटन कार्यक्रममा बोल्दै बानियाँले संघीयतामा सबैको अस्थित्व र पहिचानलाई स्थायित्वको लागि स्थानीय तह आवश्यक रहेको  भन्दै जनआन्दोलनको मर्म भावनमा स्थायीत्वका लागि स्थानीय निकायको भूमिका महत्वपूर्ण रहेको बताएका छन्। मनहरी ७ का वडाध्यक्ष ठाकुरराम तितुङको अध्यक्षतामा भएको कार्यक्रममा जिल्ला समन्वय समितिका उप–प्रमुख सानुकाजी लुईटेल, नेपाली कांग्रेस मकवानपुरका सभापति बुद्ध लामा, मनहरी गाउँपालिका वडानम्बर–१ का अध्यक्ष शिवप्रसाद खनाल, नेपाली कांग्रेस मनहरी गाउँपालिका सभापति प्रकाश बर्तौला, नेकपा एमाले मनहरी अध्यक्ष नवीन सुवेदी, मनहरी गाउँपालिकाका निवर्तमान अध्यक्ष एकराज उप्रेती, मनहरी शिक्षा श्रोतव्यक्ति विदुर थापा, मनहरी ५ नम्बर वडा अध्यक्ष दीपेन्द्र  अधिकारी, मनहरी ७ का वडा सदस्य नवराज सुवेदी, मनहरी गाउँपालिकाका कार्यकारी अधिकृत मोहनकुमार श्रेष्ठ, डिपार्ट सामुदायिक वन मनहरीका अध्यक्ष डम्बरबहादुर मोक्तान लगायतले  मन्तव्य व्यक्त गरेका थिए।

रत्नकुमारी एण्ड सन्स् प्रालिले गाउँपालिकाद्धारा विनियोजित ८७ लाख रकममा वडा कार्यालयको भवन निर्माण गरेको हो । त्यसैगरी सोही कार्यक्रम मार्फत मनहरी–७ मा रहेको रमन्टार मावि र रोटरी माविमा  अध्ययनका लागि आउने जेहेन्दार छात्रछात्राहरुलाई दुई लाख बराबरको २३ वटा साईकल वितरण गरिएको थियो । उक्त साइकाल कार्यक्रमका प्रमुख अतिथी बानियाँले विद्यार्थीलाई हस्तान्तरण गरेका थिए ।