मामाघर नेपालको सहयोगार्थ महायज्ञ हुने

१२ पुष, हेटौँडा । सडक बालकहरुको संरक्षण गर्दै आएको मामाघर नेपालको सहयोगार्थ हेटौंडा ७ न्यूरेनी चिसापानी चोकमा श्रीमद् भागवत् सप्ताह ज्ञान महायज्ञ हुने भएको छ । श्रीमद् भागवत १०८ सप्ताह ज्ञान महायज्ञ मुल समारोह समितिको आयोजना यही पुष १७ गतेदेखि २५ गतेसम्म महायज्ञ हुने बुधबार पत्रकार सम्मेलन मार्फत जानकारी दिएको हो । 
पत्रकार सम्मेलनमा बोल्दै महायज्ञ व्यवस्थापक लबराज अधिकारीले धार्मिक, शैक्षिक एवम् सामाजिक क्षेत्रमा योगदान पु¥याउँदै आएका तथा जीर्ण मन्दिरको सहयोगको लागि आर्थिक सहयोग जुटाउन महायज्ञ सञ्चालन गर्दै आएको बताए । 
एक बर्षबाट सुरु भएको महायज्ञ अभियानको १५ औं स्थानको रुपमा मामाघर नेपालको नबनिर्मित भवन निर्माण सहयोगार्थ हेटौंडा ७ चिसापानी चोकमा महायज्ञ गर्न लागिएको अधिकारीको भनाई छ । हालसम्म मकवानपुर लगाएत देशका अन्य विभिन्न १४ स्थानमा शैक्षिक भवन निर्माण, मन्दिर निमाृण एवम् जीर्णेद्धार गर्ने उद्धेश्यले महायज्ञ सम्पन्न भएको उनले जानकारी दिए । 
अनुमानित ६ लाखको खर्च हुने महायज्ञमा २० लाख रुपैंयाको नगद तथा जीन्सी संकलन गर्ने लक्ष्य राखिएको महायज्ञ व्यवस्थापक अधिकारीले बताए । उनले महायज्ञमा भएको खर्च कटाएर बाँकी रहेको सम्पूर्ण रकम मामाघर नेपालको भवन निर्माण सहयोगार्थ प्रदान गरिने जानकारी दिए । 
२५ गतेसम्म हुने महायज्ञमा प्रमुख बाचक बालव्यास पण्डित मनिषशरण खनाल र उपवाचक पण्डित बिनोद सापकोटाले संगीतमय कथा वाचन गर्नुहुने बताइएको छ । महायज्ञको उद्घाटन पुष १७ गते कार्यक्रम स्थलबाट शोभा कलश यात्रा सहित त्रिवेणीधाम परिक्रमा गरी कार्यक्रम स्थलमा आई कलश स्थापना गरिने आयोजकले जनाएको छ ।