नेपाल एसीसी १९ वर्षमुनिको प्रिमियर कपको फाइनलमा

४ कार्तिक, हेटौंडा । जापानलाई हराउँदै नेपाल एसीसी १९ वर्षमुनिको प्रिमियर कप क्रिकेटको फाइनलमा पुगेको छ । नेपालले जापानलाई शनिवार भएको खेलमा १ सय ४३ रनले हराएको हो । 
वर्षाले प्रभावित खेलमा जापानले जितका लागि २२ ओभरमा १ सय ८७ रनको लक्ष्य पाएकोमा ११ ओभर ५ बलमा ४३ रनमै अलआउट भयो । जापानका शोतारो हिरात्सुकाले १५ र किफर यामामोटोले १३ रन बनाए पनि अन्य खेलाडीले दोहोरो अंकमा रन जोड्न सकेनन् । बलिङतर्फ नेपालका हेमन्त धामी र दिपेश कँडेलले ३÷३, तथा सुवास भण्डारीले २ र आकाश चन्दले १ विकेट लिए । 
यसअघि मलेसियाको बायोमास ओभलमा टस हारेर ब्याटिङको निम्तो पाएको नेपालले २५ ओभरमा २ विकेट गुमाएर १ सय ४० रन बनाउँदा वर्षाले खेल रोकिएको थियो । नेपालका दीपक बोहरा ७९ रन बनाएर आउट भए । यस्तै आकाश त्रिपाठीले नटआउट ३५ रन बनाए । 
फाइनलमा पुगेसँगै नेपालले पाकिस्तानमा हुने १९ वर्षमुनिका एसिया कप खेल्ने पक्का भएको छ । यस्तै अर्काे सेमिफाइनल खेलमा सिङ्गापुरलाई हराउँदै फाइनलमा पुगेको यूएईले पनि १९ वर्षमुनिका एसिया कप खेल्ने पक्का भएको छ ।
१९ वर्षमुनिका एसिया कपमा पुग्ने तेस्रो टोलीको टुङ्गो जापान र सिङ्गापुरबीचको खेलको विजेताबाट लाग्नेछ । यो खेलको विजेताले शीर्ष ३ मा पर्दै १९ वर्षमुनिका एसिया कप खेल्न पाउनेछ ।