राष्ट्रपति पौडेलद्वारा महाअष्टमीमा पलान्चोक भगवतीको पूजा

५ कार्तिक, काभ्रे । राष्ट्रपति रामचन्द्र पौडेलले महाअष्टमीको अवसरमा पाँचखाल नगरपालिका-९ स्थित पलान्चोक भगवतीको पूजा गरेका छन् । 
राष्ट्रपति पौडेल र प्रथम महिला सविता पौडेलसहितले भगवतीको पूजा गरेकी छिन् । राष्ट्रपति पौडेल पलान्चोक भगवती मन्दिरमा दर्शन गर्न आइतबार बिहान पाँचखाल आएका थिए ।
बडा दशैंका अवसरमा महाअष्टमीको दिन राष्ट्र प्रमुखले पलान्चोकसहित नव दुर्गा भगवतीको दर्शन तथा पूजाआजा गर्ने परम्परा रहिआएको छ । काभ्रेको  पलाञ्चोक भगवतीको मन्दिर नेपालमा रहेका भगवतीको मन्दिरमध्ये सबैभन्दा पुरानो मन्दिर हो ।
वि. सं ४२५ मा राजा मानदेवको पालामा बनेको मन्दिर २०७२ सालको भूकम्पमा क्षति भएपछि २०७३ पुसमा पुरातत्व विभागमार्फत जीर्णोदार गरिएको थियो ।
नमोबुद्ध नगरपालिकास्थित बुच्चाकोटमा रहेको शिला तिब्बततर्फ लाने क्रममा आफै पलाञ्चोमा आएर बसेको र भरियालाई राती सपनामा मेरो स्थान त्यही हो भनेपछि सो स्थानमा शिला स्थापना भएको किम्वदन्ती छ । पछि सोही शिलाका आधारमा मुर्तिको रुप दिएर मन्दिर स्थापना भएको थियो । अन्त बनाउन नसकोस् भनेर कलाकारको दाहिने हात काटिएको किम्वदन्ती रहेको छ । सोही कलाकारले शोभा, नाला र नक्साल भगवतीको मूर्ती बनाएका थिए । मन्दिर दर्शन गरे मनोकामना पुरा हुने, सुख शान्ति हुने धार्मिक विश्वास छ ।