हेटौंडा लेडीको जेसीज सप्ताह सुरु

१६ कार्तिक, हेटौंडा । हेटौंडा लेडी जेसीजको जेसीज सप्ताह बुधबारबाट सुरु भएको छ । जेसीज सप्ताहको पहिलो दिन दुइवटा कार्यक्रम भएको छ । हेटौंडा–१ मा रक्तदान कार्यक्रमका बीच जेसीज सप्ताहको सुरुवात गरिएको हो । 
कार्यक्रम संयोजक सलोनी बटाजुको संयोजकत्व एवम् लेडी जेसीजका अध्यक्ष डिलमाया घर्ती दिलुको अध्यक्षतामा भएको कार्यक्रममा नेपाल रेडक्रस सोसाइटी मकवानपुरका मन्त्री सुमित्रा काफ्लेको प्रमुख आतिथ्यता रहेको थियो । कार्यक्रममा १९ जनाले रक्तदान गरेका थिए । 
यस्तै दोस्रो कार्यक्रम अन्तर्गत हेटौंडा–४ स्थित हेटौंडा क्याम्पसमा स्व. बुद्धरत्न शाक्य स्मृति खुला वक्तृत्वकला प्रतियोगिता भएको छ । कार्यक्रम संयोजक पवित्रा गुरुङको संयोजकत्वमा भएको कार्यक्रममा नेपाली कांग्रेस मकवानपुरका नेता आनन्दराम पराजुलीको प्रमुख आतिथ्यता रहेको थियो । 
जेसीज सप्ताह अन्तर्गत बिहीबार हेटौंडा १ चौकीटोलमा रहेको ओम वृद्धाश्रममा खाद्यान्न वितरण, दिउँसो बैठक सञ्चालन प्रणाली तालिम हुनेछ । १७ गते हेटौंडा–४ स्थित शितल महल चोकमा स्लो स्कुटी रेस र मनहरी १ चकरीको विद्यालयमा स्व. बासुप्रसाद पौडेल शैक्षिक सामग्री हस्तान्तरण कार्यक्रम हुनेछ । 
१८ गते बिहान हेटौंडा ५ मा रहेको हाम्रो घर बालगृहमा सरसफाइसँगै सामाग्री हस्तान्तरण तथा दिउँसो जेसीज सप्ताह समापन कार्यक्रम रहेको अध्यक्ष घर्तीले जानकारी दिइन् । जेसीज सप्ताहको मूल कार्यक्रम संयोजक अस्मिता न्यौपाने र सह–मूल कार्यक्रम संयोजक नम्रता श्रेष्ठ रहेका छन् ।