कांग्रेस बागमती प्रदेश संसदीय दलको सचेतकमा लम्साल

१७ कार्तिक, हेटौंडा । नेपाली कांग्रेस बागमती प्रदेश संसदीय दलको सचेतमा गोविन्द लम्साललाई नियुकत गरिएको छ । संसदीय दलका नेता बहादुर सिं लामाले गत असोज १ गते संसदीय दलको सचेतकमा लम्साललाई नियुक्त गरेका हुन् ।
लम्साललाई सचेतकमा असोजमै नियुक्त गरिएको भएपनि सार्वजनिक भने गरिएको थिएन । नेपाली काँग्रेस प्रदेश सभा संसदीय दलको विधान २०७४ को धारा ११ को उपधारा (१) बमोजिम बागमती प्रदेश संसदीय दलको प्रमुख सचेतकमा नियुक्त गरिएको हो । 
गत पुसमा संसदीय दलको नेतामा निर्वाचित भएसंगै लामाले दोलखाबाट निर्वाचित संसद कुन्दनराज काफ्लेलाई दलको प्रमुख सचेतक नियुक्त गरेका थिए । करिव २ महिना कांग्रेस प्रमुख प्रतिपक्षको भुमिकामा रहदा काफ्लेले जिम्मेवारी सम्हालेका थिए । 
सो समयमा प्रदेश सरकारको नेतृत्व एमाले र राप्रपाको समर्थनमा माओवादी केन्द्रले गरेको थियो । रास्ट्रपति निर्वाचनमा सत्ता समीकरण फेरिए संगै गत चैतमा कांग्रेस सरकारको समर्थन गर्दै सत्तारुढ दल बनेको थियो । सरकारको नेतृत्व माओवादी केन्द्रलाई सुम्पिएको कांग्रेसले सतापक्ष दलको मुख्य सचेतक समेत गुमाएको थियो । 
सत्तापक्ष भएसंगै कांग्रेसका काफ्लेले पाएको प्रमुख सचेतकको सेवा सुविधा सहित माओवादी केन्द्रका सांसद रत्नप्रसाद ढकालको पोल्टामा परेको थियो । 
कांग्रेस सांसद काफ्ले सचेतकको जिम्मेवारीमा झरेपछि उनले गत भदौ १८ मा सचेतक पदबाट राजिनामा दिएका थिए । काफ्लेको राजिनामा पछि सो पद रिक्त अवस्थामा रहेको थियो । 
नेता लामाले काफ्लेको राजिनामा स्वीकृत गर्दै सोही पदमा लम्साललाई नियुक्त गरेका हुन् । लम्साल २०७९ मंसिरमा भएको निर्वाचनमा धादिङ क्षेत्र नम्बर २ (१) बाट निर्वाचित सांसद हुन् ।