थाहा आइडलको 'एकल नृत्य'मा ११ जना छनौट

२१ मङ्सिर, थाहा । थाहा नगरपालिकामा जारी चौथो थाहा महोत्सवमा आयोजित थाहा आइडल एकल नृत्यमा बुधबार उत्कृष्ट ११ छनौट भएका छन् । उत्कृष्ट २० जनाबाट ११ जनाको छनौट गरिएको हो । 
छनौट हुनेमा थाहा ६ की सुहाना गोपाली, थाहा ३ की अंशु घिमिरे, मोरङका विजय मगर र सुदिप विश्वकर्मा, थाहा १२ का सोनिमा वाइवा, थाहा ४ का कृपा गोर्खाली, थाहा २ की साइना तामाङ, थाहा ३ का अनिस लामा, कुलेखानीका सन्ध्या थापा मगर, थाहा २ की स्वेता तामाङ र थाहा ५ की रियाल बल रहेका छन् ।
‘बुधबार उत्कृष्ट १० छनौट गर्ने लक्ष्य लिएका थियौँ,’ प्रतियोगिताका कार्यक्रम संयोजक यादवजंग रायमाझीले भने, ‘थाहा २ की स्वेता तामाङ र थाहा ५ की रिया बलले समान अङ्क प्राप्त गर्न सफल भए । दुवै जनाको अङ्क बराबर भएपछि ११ जनाको छनौट गरेका हौं ।’ 
‘मंसिर २१, २२ र २३ गतेबाट भोटिङ सुरु हुनेछ । भोटिङबाट २० प्रतिशत र र निर्णायकको ८० प्रतिशत गरेर निर्णय हुनेछ भने उत्कृष्ट ६ बाट शत्प्रतिशत भोटिङको आधारमा नतिजा घोषणा गर्ने उनले जानकारी दिए ।
प्रतियोगितामा निर्णायक एलिना राना मगर र विजयश्याम अमात्य रहेका छन् । थाहा नगर उद्योग वाणिज्य संघको आयोजनामा जारी चौथो थाहा महोत्सवमा बिहीबार गायिक आस्था राउत, रमेशराज भट्टराई, सम्झना लामिछाने र राजेन्द्र (गुन्द्रुके) को प्रस्तुती रहेको छ ।