हेटौंडामा पेस्तोल र २० थान गोलीसहित पक्राउ परेका सार्वजनिक

२३ मङ्सिर, हेटौँडा । मकवानपुर प्रहरीले शनिवार हेटौँडामा १ थान सेमि–अटोमेटिक पेस्तोल र २० थान गोलीसहित ३ जना व्यक्तिलाई सार्वजनिक गरेको छ । प्रहरीले उनीहरुलाई शुक्रबार प्रक्राउ गरेको जनाएको छ । 
पक्राउ पर्नेमा हेटौँडा उपमहानगरपालिका वडा नम्बर ९ बस्ने ३३ बर्षको निश्चल पौडेल, सोही स्थानका ३५ बर्षका गणेश घले र ३० बर्षको प्रितम क्षेत्री रहेका छन् । उनीहरुलाई प्रहरीेले २२ गते हेटौँडा ४ मा रहेको उनीहरुको डेराबाट पक्राउ गरेको थियो ।
प्रहरीले उनीहरुको साथबाट सेमि–अटोमेटिक पेस्तोल एक थान, २० राउण्ड गोली, हतियार सफा गर्ने रड एक थान, लागु औषध खैरो हेरोईन जस्तो देखिने धुलो पदार्थ २ ग्राम ४०० मिलिग्राम, लागु औषध तौल गर्ने डिजिटल तराजु दुई थान, पाँच थान मोबाईल, ५० हजार नगद र दुई थान मोटरसाइकल बरामद गरेको छ ।
मकवानपुर प्रहरी प्रुमख प्रहरी उपरीक्षक सीतारम रिजालका अनुसार उनीहरुले मङ्सिर १९ गते हेटौँडा ९ स्थित सूर्य प्रसाद पौडेल(सुरेश)को घरमा गोली प्रहार गरेका थिए । उनीहरुले पौडेलसँग पैशा असुल्ने उद्देश्यले डर देखाउँन गोली प्रहर गरेको अनुसन्धानबाट खुलेको प्रहरी प्रमुख रिजालले बताए ।
पक्राउ परेका तिनै जनालाई नियन्त्रणमा लिएर ज्यान मार्ने उद्योग, लागुऔषधको कारोबार र हातहतियार तथा खरखजनासम्बन्धी मुद्दा चलाउने तयारी भएको प्रहरीले जनाएको छ ।