राष्ट्रियसभा सदस्य निर्वाचन:हेटौंडामा निर्वाचन अधिकृतको कार्यालय स्थापना

१६ पुस, हेटौँडा। आगामी माघ ११ गते हुने राष्ट्रियसभा सदस्य निर्वाचनका लागि हेटौंडामा निर्वाचन अधिकृतको कार्यालय स्थापना गरिएको छ। 

सोमबार दिउँसो हेटौंडा उपमहानगरपालिका–५ स्थित प्रदेश निर्वाचन आयोगको कार्यालय भवनमा निर्वाचन अधिकृतको कार्यालय स्थापना गरिएको हो। राष्ट्रियसभामा बागमती प्रदेशबाट एक जना महिला र अन्य ३ जना गरी ४जनाको पद रिक्त हुँदैछ। रिक्त रहेको सो पदमा आगामी माघ ११ गते निर्वाचन हुँदैछ।

सोही निर्वाचन कार्यक्रम गर्नका लागि कार्यालय स्थापना गरिएको हो। बागमती प्रदेशको राष्ट्रियसभा निर्वाचनका लागि मकवानपुर जिल्ला अदालतका मुख्य न्यायाधीश महेन्द्र बहादुर कार्कीलाई निर्वाचन अधिकृत तोकिएको छ। निर्वाचन आयोगका अनुसार राष्ट्रियसभा सदस्य निर्वाचन अधिकृतको कार्यालय हेटौडाले आगामी पुस २० गते मतदाताको नामावली प्रकाशन गर्नेछ। पुस २३ गते विहान १० बजेदेखि दिउँसो ३ बजेसम्म उम्मेदवारको मनोनयन दर्ताको कार्यतालिका रहेको छ।त्यसैगरी माघ ११ गते बिहान ९ बजे देखि ३ बजेसम्म मतदान कार्यक्रम संचालन हुनेछ।हेटौंडा उपमहानगरपालिका–४ मा रहेको भुटनदेवी मा विमा मतदान स्थल तोकिएको छ। प्रदेशमा बागमती प्रदेशसभाको एक सय १० जना प्रदेशसभा सदस्यहरु र प्रदेशका १३ जिल्लाका एक सय १९ वटा स्थानीय तहका दुई सय ३७ प्रमुख र उपप्रमुख गरी कुल ३ सय ४७ जना मतदाता छन्। दोलखाको गौरीशङ्कर गाउँपालिका उपाध्यक्षको भने निधन भएकोले १ पद रिक्त रहेको हो।