सर्लाहीको बरहथवामा कर्फ्यु

२१ पुस,हरिवन। सर्लाहीको बरहथवामा प्रहरीको गोली लागेर एक जनाको मृत्यु पछि अवस्था उग्र बनेपछि प्रशासनले कर्फ्यु जारी गरेको छ।

शुक्रबारको घटाले स्थिति तनावग्रस्त बनेपछि स्थानीय प्रशासनले बरहथवा बजार क्षेत्रमा कर्फ्यु आदेश जारी गरेको हो । जिल्ला सुरक्षा समितिको शुक्रबार बसेको आकस्मिक बैठकले बरहथवा बजार क्षेत्रमा शनिबार बिहान ८ बजेसम्मको लागि कर्फ्यु आदेश जारी गरेको हो । समितिले जारी गरेको आदेशमा पूर्वमा सीतापुर जाने बाटो ब्रह्मस्थान, पश्चिममा हजरिया जाने बाटो नहर, उत्तरमा सोती चोर्निया पुल र दक्षिणमा हनुमान मन्दिरलाई चार किल्ला कायम गरेर शुक्रबार साँझ ५:३० बजेदेखि कर्फ्यु आदेश जारी भएको हो ।

अस्पतालको विषयमा वरहथवा नगर कार्यपालिकामा बिवाद भएपछि सत्तापक्षीय पाँच दलले आह्वान गरेको बन्दका क्रममा झडप हुँदा प्रहरीले चलाएको गोली लागेर सर्लाहीको बरहथवामा एक युवाको ज्यान गएको थियो । उक्त घटनामा बरहथवा नगरपालिका– ६ का ३२ वर्षीय जयशंकर साहको प्रहरीको गोली लागेर मृत्यु भएको हो । उनको टाउकोमा गोली लागेको प्रहरीले जनाएको छ । त्यसैगरी बरहथवा नगरपालिका– ८ का अभिषेक राम घाइते छन् । उनको खुट्टामा गोली लागेको छ ।सर्लाही प्रहरीले आन्दोलनकारी नगर प्रमुखको घर घेराउन गर्न गएको र प्रहरीको हतियार खोस्न थालेपछि गोली चलाउन परेको दाबी गरेको छ।