सर्लाहीको बरहथवामा कर्फ्यु हटाएर निषेधाज्ञा

२१ पुस,हरिवन। प्रहरीको गोली लागेर एक युवकको मृत्यु भएपछि अशान्त बनेको सर्लाहीको बरहथवामा यस अघि स्थानीय प्रशासनले लगाएको कर्फ्यु हटाएर निषेधाज्ञा जारी गरेको छ। 

जिल्ला प्रशासन कार्यालय सर्लाहीले शनिबार बिहान ८ बजेदेखि भोलि बिहान ८ बजेसम्मका लागि निषेधाज्ञा लगाएको सर्लाहीका सहायक प्रमुख जिल्ला अधिकारी होमप्रसाद घिमिरेले  बताएका छन् । नगरपालिकाको पूर्वमा सीतापुर जाने बाटोको बह्मस्थान, पश्चिममा हजरिया जाने बाटोको नहर, दक्षिणमा हनुमान मन्दिर र उत्तरमा सोती चोर्निया पुलभित्र निषेधाज्ञा लागू हुनेछ । निषेधाज्ञाको समयमा भेला हुन, सभा तथा गतिविधि गर्न नपाइने बताइएको छ । सर्लाहीको बरहथवामा नगर अस्पतालको विषयलाई लिएर नगर प्रमुख र नगर कार्यसमितिका सदस्यको बिवादकाले बरहथवा बन्द गराउने क्रममा  प्रदर्शन हुदा प्रहरीको गोली लागेर बरहथवा नगरपालिका– ६ का जयशंकर साहको मृत्यु भएको थियो । प्रदर्शनको क्रममा प्रहरी र स्थानीयबिच भएको झडपमा प्रहरीको गोली लागेर उनको मृत्यु भएको हो ।मृतक जयशङ्कर साहको शव अहिलेसम्म घटनास्थलमै रहेका स्थानीयले बताएका छन् । घटनाको छानबिनलागि छानबिन समिति गठन गर्ने तयारी भइरहेको जनाइएको छ।