हेटौँडामा फागुन ४ बाट कुम्भ यज्ञ हुने

२३ पुस, हेटौँडा । नेपाल तिर्थ प्रकाश संघको आयोजनामा हेटौँडा–४ पशुपतिमन्दिरमा फागुन ४ गतेदेखि १५ गतेसम्म गोविन्द पुष्कर पयोमृत कुम्भ यज्ञ हुने भएको छ । यज्ञ मूल समारोह समितिले आइतबार हेटौँडामा पत्रकार सम्मेलन गरी कुम्भ यज्ञको तयारीबारे जानकारी दिएको हो । 
देशभरका १ सय ८ स्थानमा एकै दिन एकै समयमा लगाईने महायज्ञमध्ये मूल यज्ञ हेटौँडामा हुन लागेको मूल समारोह समितिका अध्यक्ष कुमार पौडेलले जानकारी दिनुभयो । देशभर संचालन हुने यज्ञका लागि ९१ लाख रुपैंँया खर्च हुने र १ करोड २१ लाख रुपैंया आम्दानी गर्ने लक्ष्य राखिएको यज्ञबाट बचत रकमले जडिबुटि उत्पादन अध्ययन र उपचार केन्द्र संचालन गरिने जनाईएको छ । 
यज्ञका क्रममा २० हजार जना कर्ता बनाई यज्ञमा संलग्न गराईने आयोजकको भनाई छ । पत्रकार सम्मेलनमा महायज्ञका सल्लाहकार प्रकाश पौडेल, तिर्थ प्रकाश संघका महासचिव सुनिल अधिकारी, सदस्य श्रीहरिप्रपन्नाचार्य सापकोटा, अग्नि होत्राश्रम रजैयाका सचिव विनोद अर्याल लगायतले यज्ञको महत्व र तयारी लगायतका बारेमा जानकारी दिएका थिए । 
यज्ञमा अग्निहोत्राश्रम रजैयाका संरक्षक डा. अग्नीहोत्री सिताराम खनाल प्रमुख वाचक रहने आयोजकले जनाएको छ ।