नेता बानियाँद्वारा टासी छ्योलिङ गुम्बाको नवनिर्मित भवन उद्घाटन

२९ पुस, हेटौँडा । नेपाली कांग्रेस बागमती प्रदेश सभापति एवं बागमती प्रदेशसभा सदस्य ईन्द्रबहादुर बानियाँले आईतबार हेटौंडा १३ मेम्बर टोलामा रहेको टासी छ्योलिङ गुम्बाको नवनिर्मित गुम्बा भवन उदघाटन गरेका छन् । 
सभापति बानियाँले गुम्बाको १५ औं साधारणसभाको अवसरमा नवनिर्मित भवनको उदघाटन गरेका हुन् । २०७२ सालमा आएको भुकम्पबाट पूर्णरुपमा क्षति भएको गुम्बा संघीय सरकार, बागमती प्रदेश सरकार र वडाको सहयोग तथा स्थानीयको श्रमदानबाट हालै निर्माण सम्पन्न भएको हो । 
गुम्बा निर्माणमा १ करोड १७ लाख रुपैयाँ लागेको गुम्बाकी अध्यक्ष लक्ष्मी थिङ्गले जानकारी दिइन् । साधारणसभा तथा गुम्बा भवनको उद्घाटनपछि बोल्दै प्रमुख अतिथि बानियाँले बौद्ध गुम्बाबाट प्राप्त हुने ज्ञानले सबैलाई एकताबद्ध बनाउँदै सत्य र अहिंसाको बाटोमा लाग्न प्रेरित गर्ने बताए । 
भुकम्पबाट क्षतविक्षत भएको टासी छ्योलिङ गुम्बा स्थानीय समाजसेवी तथा अग्रजहरुको आग्रहमा आफूले प्रदेश सरकारबाट वजेट विनियोजनमा सहयोग गरेको बताउँदै नेता बानियाँले आगामी दिनमा पनि यसको घेराबारा तथा पूर्वाधार निर्माणमा सक्दो सहयोग गर्ने प्रतिवद्दता पनि व्यक्त गरे । 
कार्यक्रममा नेपाली कांग्रेस मकवानपुरका सभापति बुद्ध लामा, हेटौंडा उपमहानगरपालिकाका उपमेयर राजेश बानियाँ, हेटौंडा १३ का वडाअध्यक्ष पेमा लामा, बौद्ध धर्मगुरु निमा छोगेल लामा, गुम्बाका उपाध्यक्ष शंकरबहादुर थिङ्गलगायतले मन्तव्य ब्यक्त गरेका थिए ।