पूर्वराजा ज्ञानेन्द्र माघ ७ गते हेटौँडा आउने

३ माघ, हेटौंडा । पूर्वराजा ज्ञानेन्द्र शाह यही माघ ७ गते बागमती प्रदेशको राजधानी हेटौँडा आउने भएका छन् । पूर्वराज शाहाको हेटौँडा भ्रमणको बारेमा बुधबार हेटौँडामा राष्ट्रिय प्रजातन्त्र पार्टी मकवानपुर र रिपोटर्स क्लब नेपाल मकवानपुरले पत्रकार सम्मेलनको आयोजना गरी जानकारी दिएको हो । 
पत्रकार सम्मेलनमा राप्रपाका नेता तथा प्रतिनिधि सभा सदस्य दीपक बहादुर सिंहले पुर्वराजा शाहले हेटौँडाका विभिन्न धार्मिक स्थलको अवलोकनसहित पुजा–आजा गर्नुका साथै शुभेच्छुक र समर्थकहरुसँग भेट गर्ने जानकारी दिए । नेता सिंहका अनुसार पूर्वराजा ज्ञानेन्द्रले हेटौँडाको चुरियामाई मन्दिर, हेटौँडा–१० मा रहेको भुटनदेवी मन्दिर र हेटौँडा–१३ पदमपोखरीमा रहेको ज्याङछुपलिङ पोतला गुम्बाको अवलोकनसहित पुजाआज गर्ने कार्यक्रम रहेको छ । 
यस्तै पूर्वराजा शाहले पैदलयात्रासहित धार्मिक अवलोकन भ्रमण गर्ने र हेटौँडा ५ मा रहेको हेटौँडा रिसोर्टमा मकवानपुरका उद्योगी, व्यवसायी, शुभेच्छुक तथा पत्रकारहरुसँग समेत भेटघाट गर्ने जानकारी दिए । 
पूर्वराजा शाहको हेटौँडामा स्वागतका लागी नेता सिंहको संयोजकत्वमा मूल समारोह समिति तथा उपसमितिहरु पनि गठन गरिएको छ । पूर्वराजा शाहलाई एक हजार १११ जनाले स्वागत गर्ने कार्यक्रम तय भएको नेता सिंहले बताए । 
पत्रकार सम्मेलनमा रिपोर्टर्स क्लब मकवानपुरका अध्यक्ष बलराम पुडासैनी, राप्रपा केन्द्रीय सदस्य रामहरि न्यौपाने, सचिव गुञ्जबहादुर न्यौपाने, बागमती प्रदेश सदस्य ध्रुव प्रसाद सञ्जेल, राप्रपा मकवानपुरका प्रवक्ता आयुष डोटेल, राष्ट्रिय प्रजातान्त्रिक महिला संगठनकी केन्द्रीय सचिव सरस्वती थिङ्लगायतको उपस्थिति थियो ।