प्रेस चौतारी मकवानपुरको दुईदिने कार्यशाला सुरु

६ माघ, हेटौँडा । बागमती प्रदेशका पूर्वमुख्यमन्त्री डोरमणि पौडेलले पत्रकारहरुलाई विभिन्न संगठनको रुपमा विभिजित भएर लाग्नु भन्दा पनि व्यावसायीक पत्रकारिता गर्न आग्रह गरेका छन् ।
प्रेस चौतारी नेपाल जिल्ला कमिटी मकवानपुरको आयोजनामा शुक्रबारबाट सुरु भएको ‘प्रविधिको विकास र डिजिटल पत्रकारिता’को चुनौती र सम्भावना विषयक दुईदिने कार्यशालामा बोल्दै पौडेलले यस्तो बताएका हुन् ।
उनले पत्रकारले समय सापेक्ष आफुलाई परिवर्तन गर्दै लैजानुपर्नेमा जोड दिए । पत्रकार भनेको समाजको ऐना भएको उल्लेख गर्दै उनले समय अनुसार परिवर्तन र परिस्कृत हुन नसक्ने पत्रकारले समाजलाई केहि पनि नयाँ दिन नसक्ने दावी गरे । उनले दुईदिने कार्यशालाबाट डिजिटल पत्रकारिताका बिषयमा केही न केही नयाँ सिक्न आग्रह पनि गरे । 
कार्यशालाका मुख्य प्रशिक्षक बागमती प्रदेशको सञ्चार रजिष्टार रेवती सापकोटाले ‘प्रविधिको विकास र डिजिटल पत्रकारिता’ को चुनौती र सम्भावनाका विषयमा सहजिकरण गरेका थिए ।
कार्यक्रममा नेपाल पत्रकार महासंघ बागमती प्रदेशका संस्थापक अध्यक्ष प्रताप विष्ट, मकवानपुर उपाध्यक्ष ध्रुब अधिकारी, प्रेस चौतारी नेपालका केन्द्रीय सदस्य तथा जिल्ला इन्चार्ज हरि हुमागाईं, स्वतन्त्र पत्रकार संघ मकवानपुरका अध्यक्ष गोकुल अधिकारी लगायतकाले शुभकामना मन्तव्य व्यक्त गरे ।
चौतारी मकवानपुरका अध्यक्ष बालकृष्ण अधिकारीको अध्यक्षतामा भएको कार्यक्रममा प्रेस चौतारी नेपाल बागमती प्रदेशका महासचिव प्रकास दाहाल, पूर्वकेन्द्रीय सदस्यहरु उज्वल अधिकारी, दिपेन्द्र रोक्का, चौतारीका निवर्तमान अध्यक्ष धर्मेन्द्र दाहाल लगायतकाको आतिथ्यता रहेको थियो ।