मकवानपुर गोल्डकपः एपिएफ सेमिफाइनलमा

२४ माघ, हेटौंडा । थ्रीस्टार क्लवलाई ४–० ले हराउँदै सशस्त्र प्रहरीको एपिएफ क्लव मकवानपुर जिल्ला फुटबल संघको आयोजनामा हेटौँडामा जारी मकवानपुर गोल्डकपको सेमिफाइनल प्रवेश गरेको छ । मंगलबार भएको एकपक्षीय खेलमा एपिएफले पहिलो हाफमा १ र दोस्रो हाफमा ३ गोल गरेको हो । 
आहा रारा गोल्डकपको उपविजेता थ्रीस्टारमाथि एपिएफले ४५ औं मिनेटमा एनिसेटको गोलमार्फत अग्रता लिएको थियो । थ्रीस्टारका डिफेण्डर जीवन गुरुङले प्रदीप लामालाई लडाएपछि प्राप्त फ्रिकिकलाई सदुपयोग गर्दै एनिसेटले गोल गरेका थिए । उनको प्रहार पोष्टमा लाग्दै गोलमा परिणत भएको थियो । 
४८ औं मिनेटमा एपिएफका अनिष महर्जनले अग्रता दोब्बर बनाए । दायाँबाट आएको क्रसलाई उनले हेडमार्फत गोल गरेका हुन् । ५८ औं मिनेटमा एपिएफले अर्को गोल थप्यो । प्रदीप लामाको प्रहार थ्रीस्टारका गोलरक्षक अभिषेक बरालको हातबाट फुत्किँदै गोलमा परिणत भएको हो । 
७७ मिनेटमा एपिएफका विदेशी खेलाडी सर्ज संगले चौथो तथा अन्तिम गोल गरे । फोडे फोफोनाले मैदानको करिब मध्य भागबाट लगेको बललाई उनले गोल गरेका हुन् । खेलमा थ्रीस्टारले खासै मुभ बनाउन सकेन । ७९ औं मिनेटमा थ्रीस्टारका दिपेश घलेले दुई डिफेण्डरलाई छलाउँदै गरेको प्रहारलाई एपिएफका गोलरक्षक एन्जल श्रेष्ठले मुस्किलले जोगाए ।
 खेलको म्यान अफ द म्याच एपिएफका प्रदीप लामा घोषित भए । उनले नगद १० हजार रुपैयाँसहित ट्रफी प्राप्त गरे । एपिएफका प्रशिक्षक सुमन श्रेष्ठले आफ्नो रणनीति अनुसार नै खेलाडीहरुले खेल खेलेको प्रतिक्रिया दिए । यता थ्रीस्टारका प्रशिक्षक विक्रम लामाले राम्रै खेल हुँदाहुँदै हार व्यहोर्नुपरेको बताए । यो संगै जारी सहिद स्मृति स्थानीय तह मकवानपुर गोल्डकपको छैठौं संस्करणको सेमिफाइनल समिकरण पूरा भएको छ । 
बुधबारबाट सेमिफाइनल चरणको खेल हुनेछ । पहिलो सेमिफाइनल न्यूरोड टिम एनआरटी र राजारानी क्लव धनकुटाको बीचमा हुनेछ । २७ गतेसम्म सन्चालन हुने प्रतियोगिताको विजेताले १५ लाख र उपविजेताले १० लाख प्राप्त गर्नेछ । सर्वोत्कृष्ट खेलाडीले बुलेट मोटरसाइकल र विधागत उत्कृष्टले जनही २५ हजार रुपैयाँ प्राप्त गर्नेछन् ।