हेटौंडामा एडिबी र वर्ल्ड बैंकद्वारा परामर्श कार्यक्रम सम्पन्न

११ फागुन, हेटौंडा । एसियाली विकास बैंक र विश्व बैंकको आयोजनामा हेटौंडामा शुक्रबार परामर्श कार्यक्रम सम्पन्न भएको छ । एडिबि र वर्ल्ड बैंकले नेपालका लागि राष्ट्रिय सहकार्य रणनीतिसम्बन्धी निजी क्षेत्र तथा गैरसरकारी संस्थाहरूका प्रतिनिधिहरूसंग परामर्श गरेको हो ।
कार्यक्रममा प्रदेश नीति तथा योजना आयोगका उपाध्यक्ष प्रा.डा. नरविक्रम थापाले प्रादेशिक योजनाका चुनौती र अवसर र विश्व बैंकका विज्ञान प्रधान र एसियाली विकास बैंकका श्रीकृष्ण पाठकले एडिबि र विश्व बैंकको राष्ट्रिय साझेदारी रणनीतिबारे प्रस्तुतिकरण गरेका थिए । कार्यक्रममा नीजि क्षेत्र र सामाजिक संघसंस्थाका प्रतिनिधिले समूहगत छलफल गरि अपेक्षाबारे धारणा प्रस्तुत गरेका थिए ।
एडिबिले बागमती प्रदेशका १३ जिल्लामा १० क्षेत्रका २४  वटा योजनामा लगानी गरेको जानकारी दिइएको थियोे । वर्ल्ड बैंकले बागमती प्रदेशमा मूख्य ७ वटा क्षेत्रसहित अन्य क्षेत्रमा लगानी गरेको छ ।
कार्यक्रममा बागमती प्रदेश मूख्यमन्त्री तथा मन्त्री परिषद कार्यालयकी सचिव हुमकला पाण्डे, एसियाली विकास बैंकका प्रमुख अर्थशास्त्री यान हान्सेन, विश्व बैंकका बरिष्ठ अधिकृत विज्ञान प्रधान लगायतले मन्तव्य व्यक्त गरेका छन् । 
कार्यक्रममा नीजि क्षेत्रका विभिन्न संस्था, शिक्षा क्षेत्रका विभिन्न संस्था, सामाजिक संघसंस्थाका प्रतिनिधि र संचारकर्मीहरूको सहभागिता रहेको थियो ।
यसअघि बिहीबार स्थानीय सरकारका अध्यक्ष र उपाध्यक्ष, बागमती प्रदेशका विभिन्न मन्त्रालयका सचिव लगायतसंग परामर्श गरेको थियो ।