कांग्रेस नेतामाथि प्रतिशोध राखेको भन्दै तरूण दल मनहरीको विरोध

१२ फागुन, हेटौंडा । मनहरीका ५ राजनीतिक दलले कांग्रेस नेतामाथि प्रतिशोध राखेको भन्दै तरूण दल मनहरी गाउँपालिकाले विरोध जनाएको छ ।
मनहरीका नेकपा एमाले, नेकपा माओवादी, राप्रपा, स्वतन्त्र पार्टी र नेकपा एकीकृत समाजवादीले प्रदेशसभा सदस्य एवं कांग्रेस बागमती प्रदेश सभापति ईन्द्रबहादुर बानियाँमाथि प्रतिशोध राखेको भन्दै तरूण मनहरीले विरोध जनाएको हो ।
राजनीतिक चरित्र हत्या गर्ने उद्धेश्यले ५ दलले उदण्डता देखाएको भन्दै बिराेधमा तरूण दल मनहरीले मनहरी गाउँपालिकालाई ज्ञापन पत्र बुझाउने र बिराेध सभा गर्ने तरूण दल मनहरीका अध्यक्ष स्वतन्त्र उप्रेतीले जानकारी दिए । तरूण दल विकासको पक्षमा रहे पनि राजनीतिक प्रतिशोधको विरोधमा रहेकाले आइतबार ज्ञापनपत्र बुझाउने तरूण दलले जनाएको छ ।
यसअघि घटनाको विरोधमा नेपाली कांग्रेस मनहरी गाउँपालिकाले समेत प्रेस विज्ञप्ति जारी गरी विरोध जनाई सकेको छ ।
शुक्रबार मनहरीका ५ राजनीतिक दलले विभिन्न पुल निर्माण नभएको भन्दै त्यस क्षेत्रका सांसद बानियाँसहितको फोटो राखेर व्यानर बनाई विरोध प्रदर्शन गरेका थिए । तर पुल निर्माणको ठेक्का पाएको निर्माण कम्पनी हिराचन-बानियाँ जेभीले पुल निर्माण अन्तिम चरणमा रहेको जनाउँदै सम्झौता भएका तीन वटा पुल २०८० चैत मसान्तसम्म र एउटा पुल २०८१ बैशाख मसान्तसम्म सम्पन्न गर्ने प्रतिवद्धता रहेको जनाएको छ । उसले निर्माण कम्पनीमा सांसद बानियाँको आवद्धता नरहेको समेत स्पष्ट पारेको छ ।