स्थानीय तह वित्तिय सुशासन मुल्याङ्कनमा मनहरी जिल्लाकै पहिलो

१४ फागुन,हेटौँडा । मकवानपुरको मनहरी गाउँपालिका  स्थानीय तह वित्तिय सुशासन मुल्याङ्कन (एफआरए)मा जिल्लामै पहिलो हुन सफल भएको छ । नेपाल सरकार संघिय मामिला तथा सामान्य प्रशासन मन्त्रालायले जिल्ला समन्वय समितिको सहयोगमा गर्ने मुल्याङ्कन अन्र्तगत वित्तीय सुशासनमा मनहरी पहिलो बन्न सफल भएको हो । मनहरीले  ७३ दशमलव ५ अंक प्राप्त गरेको छ । यस मुल्याङ्कनका लागि योजना, वजेट तथा कार्यक्रमको व्यवस्थापन, कार्यन्वयन क्षमता, लेखाङ्कन तथा प्रतिवेदन, अनुगमन तथा लेखापरीक्षण र राजस्व व्यवस्थापनलाई सुचक मानिन्छ । त्यही सुचकको आधारमा जिससले मुल्यांकन प्रतिवेदन तयार पार्ने गर्दछ । 
जिल्ला समन्वय समिति मकवानपुरले आर्थिक बर्ष  २०७९। ८० प्रतिवेदनमा आधारमा मनहरीलाई योजना, वजेट तथा कार्यक्रमको व्यवस्थापनमा ७१ दशमलव ४३ प्रतिशत, कार्यान्वयन क्षमता तथा व्यवस्थापनमा ८१ दशमलव ०३ प्रतिशत, लेखाङ्कन तथा प्रतिवेदनमा ८२ दशमलव ३५ प्रतिशत,अनुगमन, मुल्यांकन तथा लेखापरीक्षणमा ६२ दशमलव ५ प्रतिशत र राजस्व व्यवस्थापनमा ६४ दशमलव ७१ प्रतिशत दिएको छ ।जिससले प्रदान गरेको सम्पुर्ण विषयको औषत ७३ दशमलव ५ प्रतिशत अंक प्रदान गरेको थियो । सोही अंकका आधारमा नेपाल सरकार संघिय मामिला तथा सामान्य प्रशासन मन्त्रालायले सार्वजनिक स्थानीय तह वित्तिय सुशासन मुल्याङ्कनमा मनहरी पहिलो हुन सफल भएको हो । 
मनहरीसंगै सोही अंकका आधारमा मकवानपुरको थाहा नगरपालिका पनि स्थानीय तह वित्तिय सुशासन मुल्याङ्कनमा पहिलो भएको छ । जिससले थाहा नगरलाई पनि वित्तिय सुशासन मुल्याङ्कनको सुचकमा मनहरीलाई झै समान प्रतिशत दिएको छ । यता हेटौँडा उपमहानगरले भने ७१ प्रतिशत अंक प्राप्त गरेको छ ।