नेदरल्यान्ड्सद्वारा नामिबिया ५९ रनले पराजित

१७ फागुन, काठमाडौं । त्रिकोणात्मक अन्तर्राष्ट्रिय ट्वान्टी-२० सिरिजमा नेदरल्यान्ड्सले नामिबियालाई ५९ रनले पराजित गरेको छ ।
किर्तिपुरस्थित त्रिवि क्रिकेट मैदानमा नेदरल्यान्ड्सले नामिबियालाई दिएको दुई सय ४८ रनको लक्ष्य पछ्याउने क्रममा नामिबिया निर्धारित २० ओभरमा सात विकेट गुमाउँदै एक सय ८८ रनमै सिमित भयो । नामिबियाका लागि जान फ्रिलिङक र जान ग्रिनले समान ४२-४२ रनको योगदान दिए भने जेपी कोटेजले २६ रन, जेजे स्मिथ र रुबेन ट्रम्पलम्यानले समान १९/१९ रन बनाए । नेदरल्यान्ड्सका टिम भान डर गुगटेनले दुई विकेट, याब्रान्ड एंगेलब्रेक्ट, रोलेफ भान डर मर्वेल, भिभियन किंग्मा र आर्यन दत्तले समान एक/एक विकेट लिए ।
त्यसअघि, टस जितेर पहिला ब्याटिङ रोजेको नेदरल्यान्ड्सले निर्धारित २० ओभरमा पाँच विकेट गुमाउँदै दुई सय ४७ रन बनाएको थियो । नेदरल्यान्ड्सका लागि माइकल लेभिटले सर्वाधिक एक सय ३५ रनको योगदान दिएका थिए । साइब्रान्ड एङ्गेलब्रेख्तले ७५ र तेजा निदामनुरुले १८ रन बनाए ।
नामिबियाका लागि रुबेन ट्रम्पलम्यानले दुई विकेट लिए भने जान फ्रेइलिङ्कले र बेन सिकोन्गोले समान एक-एक विकेट लिए ।
प्रतियोगिताअन्तर्गत नेपालले नामिबियासँग शुक्रबार प्रतिष्पर्धा गर्ने छ ।