हेटौंडाका तीन विद्यालय बालमैत्री घोषणा

हेटौंडा ८ मा रहेको चन्द्रोदय मावि बालमैत्री घोषणा गरिँदै

२२ फागुन, हेटौंडा। मंगलबार बिहान बागमती प्रदेशको राजधानी हेटौंडाका तीन विद्यालय बालमैत्री घोषणा भएको छ।

हेटौँडा उपमहानगरपालिका वडा नम्बर २ मा रहेको बालजागृति इङ्गलिस बोडिङ स्कूल, हेटौंडा ८ बहादुरगंजमा रहेको चन्द्रोदय मावि र हेटौंडा १६ हटियामा रहेको जनप्रिय मावि मंगलबार एकै दिन बालमैत्री विद्यालय घोषणा गरिएको हो । हेटौंडाकी नगर प्रमुख मिना कुमारी लामा र नगर उपप्रमुख राजेश बानियाँले संयुक्त रुपमा तीन विद्यालय बालमैत्री घोषणा गरेका  हुन्। बालजागृति  संस्थागत, चन्द्रोदय र जनप्रिय सामुदायिक विद्यालय हुन्। तीनवटै विद्यालयले उपमहानगरपालिकाले तोकेका ११ वटा सूचक अन्तर्गतका २६ वटा कार्य सम्पन्न गरेकाले बालमैत्री विद्यालय घोषणा गरिएको उपमहानगरपालिकाले जनाएको छ । 

स्थानीय सरकार र राष्ट्रिय सहजकर्ताको विभिन्न समयमा गरिएको अनुगमनपछि यी विद्यालयहरू बालमैत्री घोषणाको चरणमा पुगेका थिए । विद्यायलले फरक फरक मितिमा पत्रकार सम्मेलनको आयोजना गरि बालमैत्री विद्यालय घोषणा गर्ने जनाएका थिए। बालमैत्री घोषणा पुर्व विद्यालयले जनप्रतिनिधि, विद्यालय व्यवस्थापन समितिका पदाधिकारी शिक्षक, अभिभावकको उपस्थितिमा बाजागाज सहित वडाको  परिक्रमा गरेका थिए।