एसईई परीक्षाः आज अनिवार्य नेपालीको परीक्षा

file photo

१६ चैत, हेटौंडा । बिहीबारबाट सुरु भएको माध्यमिक शिक्षा परीक्षा (एसईई)को परीक्षाको दोस्रो दिन आज अनिवार्य नेपाली बिषयको परिक्षा हुँदैछ । यसअघि हिजो विहीबारबाट सुरू भएको परीक्षमा पहिलो दिन अनिवार्य अङ्ग्रेजी विषयको परीक्षा सम्पन्न भएको थियो ।
पहिलो दिनको परीक्षामा मकवानपुर जिल्लाबाट ११७ जना अनुपस्थित भएको शिक्षा विकास तथा समन्वय ईकाई मकवानपुरका शाखाले जानकारी दिएको छ । एसईई परीक्षाको लागि जिल्लाबाट ६ हजार १ सय ३३ जनाले फर्म भरेकोमा अङ्ग्रेजीको परीक्षामा ६ हजार १६ जना परीक्षार्थी मात्रै सहभागी भएका हुन् । 
मकवानपुरमा २६ परीक्षा केन्द्र कायम भएकोमा सबैभन्दा बढी राक्सिराङको प्रजा जागृति माध्यमिक विद्यालयको परीक्षा केन्द्रमा परीक्षार्थी अनुपस्थित भएको शिक्षा विकास तथा समन्वय ईकाई मकवानपुरका शाखा अधिकृत उन्नती ढकालले जानकारी दिइन् । प्रजा जागृति परीक्षा केन्द्रमा २१ छात्रा र ११ छात्र गरी ३२ जना अङ्ग्रेजी विषयको परीक्षामा अनुपस्थित भएका छन् । गत वर्ष मकवानपुरमा २५ परीक्षा केन्द्र रहेकोमा यस वर्ष राक्सिराङको प्रजा जागृति माध्यमिक विद्यालयलाई नयाँ परीक्षा केन्द्र थप गरिएको हो ।
यसैगरी जनता माविमा ३ जना, बुद्ध मावि हात्तिसुडे केन्द्रमा ९ जना, महेन्द्र मावि छतिवनमा १ जना, जनप्रिय माविमा ३ जना, जनकल्याण माविमा ६ जना, मत्स्यनारायण माविमा ३ जना विद्यार्थी अनुपस्थित भएका छन् । 
यस्तै राष्ट्रिय रोटरी माविमा ६, महेन्द्रकिरण मावि ज्यामिरेमा ४, महेन्द्रकिरण मावि बसामाडी केन्द्रमा ५, निर्मल माविमा एकजना, वंशगोपाल माविमा एकजना, बालज्योति मावि पिप्लेमा ११ जना, भुटनदेवी माविमा ९ जना, सिद्धार्थ माविमा ४ जना, जीएस निकेतनमा ११ जना, सोलिड्यारिटी इन्टरनेशनल केन्द्रमा २ जना, प्रगति माविमा ३ जना र अमर मावि ३ जना अनुपस्थित रहेको शिक्षा विकास तथा समन्वय ईकाइ मकवानपुरको हाजिरीमा उल्लेख छ ।