एमालेका थपलियाले लिए मन्त्री पदको शपथ

१७ चैत, हेटौंडा । बागमती प्रदेशका मुख्यमन्त्री शालिकराम जम्कट्टेलले मन्त्रिपरिष विस्तार गरेका छन् । उनले एमाले बागमती प्रदेश संसदीय दलका जगन्नाथ थपलियालाई मन्त्रीमा नियुक्त गरेका हुन् ।
नेता थपलियाले आज साँझै मन्त्री पदको सपथ ग्रशण समेत गरेका छन् । मुख्यमन्त्री जम्कट्टेलको सिफारिसमा प्रदेश प्रमुख यादव चन्द्र शर्माले नेता थपलियालाई शपथ ग्रहण गराएका हेुन् । 
मुख्यमन्त्री जम्कट्टेलले नेता थपलियालाई आर्थिक मामिला तथा योजना मन्त्रालयको जिम्मेवारी तोकेका छन् । नेता थपलिया दोस्रो पटक प्रदेश सरकारमा सहभागि भएका हुन् । उनी गत २०७९ पुस २६ मा पहिलो पटक प्रदेश सरकारको आर्थिक मामिला तथा योजना मन्त्री नियुक्त भएका थिए ।
करिव ४ महिना सरकारमा रहेका उनी राष्ट्रपति निर्वाचनमा सत्ता समिकरण परिवर्तन भएपछि एमाले सरकारबाट अलग भएका थिए । सो समयमा नेता थपलियाको नेतृत्वमा थप ३ मन्त्री सहित एमाले सरकारमा सहभागि भएको थियो । सत्ता समिकरण परिवर्तन पछि चैत १० मा एमालेका मन्त्रीहरुले पदबाट राजिनामा दिएर प्रतिपक्षमा बस्ने निर्णय गरेका थिए ।
२०७९ चैत १० मा बागमती प्रदेश सरकारबाट बाहिरिएको एमाले १३ महिनापछि पुनः प्रदेश सरकारमा फर्किएको हो । सत्ता समिकरण बदलिए पछि गत फागुन २३ मा सरकारबाट कांग्रेस बाहिरिएपछि एमालेले दोस्रोपटक सरकारमा सहभागी हुने अवसर पाएको हो ।
६ जना मन्त्री फिर्ता बोलाएर कांग्रेसले सरकारको समर्थन फिर्ता लिएको थियो । कांग्रेसको समर्थन फिर्ता भएसंगै मुख्यमन्त्री जम्कट्टेल नेतृत्वको सरकार अल्पमतमा परेको छ । अल्पमतमा रहेका मुख्यमन्त्री जम्कट्टेल यहि १९ गते विश्वासको मत लिने कार्यतालिका रहेको छ ।