निर्माण व्यवसायी महिला समितिद्वारा २ संस्थालाई सहयोग

१८ चैत, हेटौंडा । नेपाल निर्माण व्यवसायी महासंघ महिला समन्वय समितिले मकवानपुरका दुईवटा संस्थालाई आर्थिक सहयोग गरेको छ । 
महासंघको हेटौंडामा भएको २५ औँ वार्षिक साधारणसभाको अवसरमा निर्माण व्यवसायी महिला समन्वय समितिले दुई संस्थालाई नगद २५÷२५ हजार रुपैयाँ आर्थिक सहयोग गरेको हो । 
निर्माण व्यवसायी महिला समन्वय समितिको व्यवस्थापन एवम् निर्माण व्यवसायी संघ मकवानपुरको समन्वयमा शनिबार छुट्टाछुट्टै कार्यक्रमकाबीच हेटौँडा–४ मा रहेको सेन्टर फर अटिजम मकवानपुर र हेटौँडा १७ गैरीगाउँमा  रहेको श्रीमद् भागवत ज्ञानसञ्चार वृद्धाश्रमलाई आर्थिक सहयोग प्रदान गरिएको हो । 
दुवै संस्थालाई निर्माण व्यवसायी संघका पदाधिकारीले २५÷२५ हजार रुपैयाँको चेक प्रदान गरेका हुन् । नेपाल निर्माण व्यवसायी महासंघका केन्द्रीय सदस्य एवं निर्माण व्यवसायी महिला समन्वय समितिका संयोजक गंगा पोखरेलले सहयोग हस्तान्तरण कार्यक्रममा महासंघको साधारण सभाको अवसरमा आन्तरिक रुपमा स्रोत जुटाएर सामाजिक संस्थालाई आर्थिक सहयोग गरिएको बताइन् ।
सहयोग हस्तान्तरण कार्यक्रममा महासंघका केन्द्रीय सदस्य गीता शाही, निर्माण व्यवसायी संघ मकवानपुरका अध्यक्ष बालगोपाल कँडेलसहित जिल्लाका पदाधिकारी एवम् सदस्यहरुको उपस्थिती थियो ।