वैशाख ५ गते आँचलले वक्तृत्वकला प्रतियोगिता गर्ने

२५ चैत, हेटौंडा । मकवानपुरका महिला साहित्यकारहरुको अग्रणी संस्था आँचल साहित्य कला पुञ्ज मकवानपुरले यस वर्षपनि साहित्यकार पारिजातको स्मृति दिवसको अवसरमा विविध कार्यक्रमको आयोजना गर्ने भएको छ । 
आइतबार पत्रकार सम्मेलन गर्दै वैशाख ५ गर्ने विविध कार्यक्रमका बारेमा जानकारी गराइएको छ । आँचलकी अध्यक्ष भावना सापकोटाले यस वर्ष वक्तृत्वकला प्रतियोगिता आयोजना गर्न जानकारी दिइन् । 
हेटौँडा उपमहानगरपालिका वडा नम्बर १० कार्यलयसँगको सहकार्यमा हुने वक्तृत्वकला कार्यक्रमको बिषय “नेपालको सामाजिक रुपान्तरणमा राजनीतिक आन्दोलनको भूमिका” रहेको अध्यक्ष सापकोटाले बताइन् । प्रतियोगितामा पहिलो, दोस्रो र तेस्रो हुनेलाई क्रमशः ८ हजार, ६ हजार, ४ हजार नगद सहित प्रमाणपत्र प्रदान गरिनेछ । प्रतियोगितामा सान्त्वना हुने एकजनाले नगद २ हजार प्राप्त गर्नेछन् । 
यस्तै अध्यक्ष सापकोटाले आउँदो वैशाख १५ गते हेटौंडा उपमहानगरपालिकासँगको सहकार्यमा बृहत् साँस्कृतिक तथा साहित्यिक कार्यक्रमको आयोजना गर्ने पनि जानकारी गराइन् । उक्त अवसरमा विभिन्न विद्यामा श्रष्टा सम्मान, विद्यालय स्तरीय एकल गयन प्रतियोगिता, बहस कार्यक्रम लगायत गर्ने उनको भनाई छ । विद्यालय स्तरीय एकल गायनमा प्रथम, द्धितिय, तृतीय र सान्त्वना हुनेलाई क्रमशः नगद ८ हजार, ६ हजार, ४ हजार र २ हजार सहित प्रमाणपत्र प्रदान गरिनेछ ।
आँचलकी अध्यक्ष सापकोटाको सभाध्यक्षतामा भएको पत्रकार सम्मेलनमा हेटौंडा १० का वडा अध्यक्ष फुर्वादोर्जे लामा, सञ्चारिका समूह बागमती प्रदेश अध्यक्ष सरीता दाहाल, साहित्य संगम मकवानपुरका अध्यक्ष डीबी बर्तौला, नेपाली लेखक संघ मकवानपुरका अध्यक्ष छवि अनित्य  लगायतको आतिथ्यता रहेको थियो ।