नेवाः राष्ट्रिय मुक्ति मोर्चाको प्रदेश सरकारलाई ध्यानाकर्षण

१० बैशाख, हेटौंडा । नेवाः राष्ट्रिय मुक्ति मोर्चाले नेवारी समुदायको भाषा, संस्कति, कला र साहित्यको संरक्षणका लागी प्रदेश सरकारलाई तत्काल उपयुक्त नीति तथा कार्यक्रम ल्याउन माग गरेको छ । 
आइतबार हेटौंडामा प्रदेशका मुख्यमन्त्री शालिकराम जम्कट्टेल र संस्कृति पर्यटन तथा सहकारी मन्त्री शैलेन्द्रमान बज्राचार्यलाई ज्ञापन पत्र बुझाउदै मोर्चाका अध्यक्ष दिलीप महर्जन र महासचिव एवं प्रदेशसभा सदस्य देवेन्द्र श्रेष्ठले यस्तो माग गरेका हुन् । 
प्रदेशको पहिचानको रुपमा रहेको नेवारी सभ्यता र संस्कृतिको जगेर्ना गर्न प्रदेश सरकारले प्रदेश सरकार मातहत नेवा प्रतिष्ठान गठनदेखि नेवार समुदाय केन्द्रित महाविद्यालय स्थापना गर्नुपर्नेसम्मका माग उनीहरुले राखेका छन् । 
ज्ञापन पत्रमा नेवा सभ्यताको अध्य्यन र अनुसन्धानका लागि प्रदेश सरकार मातहत नेवाः प्रतिष्ठान गठन गर्नुपर्ने, नेवारको परम्परागत ज्ञान प्रविधि सीप हस्तकला, भाषा, साहित्य कला, संस्कृति आदिको संरक्षण र विकासका लागि महाविद्यालयको स्थापना गर्नुपर्ने लगाएतका कुरा उल्लेख गरिएको छ ।
ज्ञापनपत्र बुझ्दै मुख्यमन्त्री जम्कट्टेलले प्रदेशका सबै जातजातिको कला, संस्कृति संरक्षण गर्ने ऐन तत्काल बनाउने बताए । उनले प्रदेशभित्र रहेका विविध जातजातिको कला, संस्कृति संरक्षण गर्ने दायीत्व प्रदेश सरकारको भएको स्विकार गर्दै आगामी साउन, भदौभित्रै आवस्यक ऐन कानुन बनाएर अगाडि बढ्ने प्रतिबद्धता व्यक्त गरे । 
यस्तै प्रदेशका संस्कृति तथा पर्यटन मन्त्री बज्राचार्यले भाषा, कला, संस्कृतिलाई जोगाउन र संरक्षण गर्न सबै एक ढिक्का भएर लाग्नुपर्ने बताए । उनले यसका लागी आफ्नो तर्फबाट सक्दो प्रयास र सयोग रहने प्रतिवद्धता व्यक्त गरे ।