आँचलले शनिवार ९ जना स्रष्टालाई सम्मान गर्ने

११ बैशाख, हेटौंडा । मकवानपुरका महिला साहित्यकारहरुको अग्रणी संस्था आँचल साहित्य कला पुञ्ज मकवानपुरले विभिन्न विद्याका ९ जना स्रष्टाहरुलाई सम्मान गर्ने भएको छ । स्रष्टालाई सम्मानका बिषयमा आँचलले सोमबार पत्रकार सम्मेलन गरी जानकारी गराएको हो ।
आँचलकी अध्यक्ष भावना सापकोटाले आगामी शनिबार हुने वृहत् साहित्यिक तथा साँस्कृतिक कार्यक्रममा विभिन्न विद्याका ९ जना स्रष्टालाई सम्मान गर्न लागेको जानकारी दिइन् । अध्यक्ष सापकोटाले हरिवंश भेटवाल र बिजुला भेटवालले स्थापना गरेको १० हजार नगद राशिको बालकुमारी जगन्नाथ भेटवाल स्मृति साहित्य सम्मान २०८० बाट रौतहट जिल्लाकी रेणुका जीसीलाई सम्मान गर्न लागेको जानकारी गराइन् । 
यस्तै प्रतिभा धिताल छन्द सम्मान २०८० बाट नुवाकोटकी सुमित्रा सुमीलाई सम्मान गरिने भएको छ । मुना अर्यालद्वारा स्थापना गरिएको यो सम्मान वापत सुमीलाई १० हजार नगद राशि र सम्मानपत्रबाट सम्मान गरिनेछ । ईश्वर लम्साल स्मृति पत्रकारिता पुरस्कारबाट सञ्चारकर्मी सरिता दहाललाई सम्मान गरिने भएको छ । अप्सरा तिमल्सिना लम्साल र प्रकाश लम्सालले स्थापना गर्नुभएको इश्वर लम्साल स्मृति सम्मानको राशि ७ हजार ५ सय रुपैयाँ रहेको छ ।
यसैगरी रुकु कार्कीले स्थापना गरेको ११ हजार १११ नगद राशिको टीकादत्त मायादेवी कुलकुमारी सम्मान २०८० बाट यसवर्ष काठमाडौं महानगरपालिकाकी प्रभा बराललाई सम्मान गरिने भएको छ । गंगाधर तिमल्सिना र यशोधरा तिमल्सिनाले स्थापना गरेको १५ हजार एक रुयैयाँको अप्सरा तिमल्सिना स्मृति साहित्य सम्मान २०८० बाट काठमाडौं महानगरपालिकाका नेत्र एटमलाई सम्मान गरिने भएको छ । 
मंगलादेवी श्रेष्ठ स्मृति बाल प्रतिभा साहित्य सम्मान २०८० बाट मकवानपुरकी प्रसिद्धि लामिछानेलाई सम्मान गरिने भएको छ । देवप्रसाद श्रेष्ठले स्थापना गर्नुभएको मंगलादेवी साहित्य सम्मानबाट लामिछानेलाई ३ हजार ५ सय रुपैयाँ नगद राशि र सम्मानपत्रसहित सम्मान गरिने जनाइएको छ । यस्तै, मुक्तितारा नवप्रतिभा सम्मानबाट स्वस्तिका बानियाँलाई सम्मान गरिनेछ । मुक्तिगोविन्द वैद्य र तारादेवी वैद्यले स्थापना गर्नुभएको सम्मानबाट बानियाँलाई ५ हजार रुपैयाँ नगद राशि र सम्मानपत्र प्रदान गरिनेछ ।
सुन्तलीमाया श्रेष्ठ युवा प्रतिभा सम्मान २०८० बाट मकवानपुरका साहित्यकार दीपक गौतमलाई सम्मान गरिनेछ । चन्द्रकिरण श्रेष्ठ र मेनुका श्रेष्ठले स्थापना गर्नुभएको सुन्तलीमाया स्मृति सम्मानबाट साहित्यकार गौतमलाई १० हजार रुपैयाँ नगर राशि र सम्मापत्र प्रदान गरिनेछ । यस्तै, आँचल साहित्य कला पुञ्जले स्थापना गरेको आँचल साहित्य सम्मान २०८० बाट हरिवंश भेटवाललाई सम्मान गरिनेछ । हेटौँडा उपमहानगरपालिकाको आर्थिक सहयोगमा हुने कार्यक्रममा स्रष्टा सम्मानसँगै बहस, एकल गायन प्रतियोगिता र रचन वाचन पनि हुने अध्यक्ष सापकोटाले जानकारी दिइन् ।