तरुण भवन बनाउन केन्द्रीय सदस्य भेटवालको २ लाख ५५ हजार सहयोग

१७ बैशाख, हेटौंडा । नेपाली कांग्रेसको युवा दस्ता नेपाल तरुण दलको केन्द्रीय कार्यसमिति भवन निर्माणका लागि तरुण केन्द्रीय सदस्य एवम् नेपाली कांग्रेसका युवा नेता राजेश भेटवालले २ लाख ५५ हजार रुपैयाँ सहयोग गरेका छन् । 
तरुण केन्द्रीय कार्यसमितिले सुरु गरेको सहयोग संकलन अभियान अन्तर्गत भेटवालले २ लाख ५५ हजार रुपैयाँ सहयोग गरेका हुन् । भेटवालले गरेको सहयोग प्राप्त भएको विवरण सार्वजनिक गर्दै तरुण दल केन्द्रीय अध्यक्ष विद्वान गुरुङले सामाजिक सन्जाल फेसबुकमार्फत धन्यवाद समेत व्यक्त गरेका छन् । 
तरुण दलको केन्द्रीय कार्यसमिति बैठकले भवन बनाउने निर्णय गरे बमोजिम सोही निर्णयलाई सार्थकता दिन नगद सहयोग गरिएको भेटवालले बताए । तरुण दलको चैत्र १५ र १६ गते बसेको केन्द्रीय समिति बैठकले केन्द्रीय कार्यालय भवन निर्माण गर्ने निर्णय गरेको थियो । सोही अनुसार आफ्नो तर्फबाट २ लाख ५५ हजार रुपैयाँ सहयोग गरेको उनले बताए । 
आरबी अर्वान विल्डर्स एण्ड सप्लायर्सका सञ्चालक समेत रहेका भेटवालले तरुणको बन्न लागेको भवनका लागि सक्दो सहयोग गर्नुपर्ने धारणा राखे । उनले आगामी दिनमा पनि सकेको सहयोग निरन्तर गर्ने प्रतिबद्धता जनाए । भवन निर्माणका लागि आवश्यक सहयोग जुट्ने क्रम जारी रहेको केन्द्रीय अध्यक्ष गुरुङले जानकारी दिए ।