भीम विराग प्रतिष्ठानद्वारा ९ जना सम्मानित

२३ बैशाख, हेटौंडा । भीम विराग संगीत साहित्य कला प्रतिष्ठान हेटौंडाद्वारा साहित्य कला तथा संगित क्षेत्रमा क्रियाशील ९ जनालाई सम्मान गरेको छ । प्रतिष्ठानले शनिबार हेटौँडामा एक कार्यक्रम आयोजना गरी साहित्य, संगीत, कला र पत्रकारितातर्फका विभिन्न विधामा योगदान गरेका तथा क्रियाशील ९ जनालाई सम्मान गरेको हो ।
प्रतिष्ठानले साहित्यतर्फ योगदान गरेको भन्दै भीम विराग राष्ट्रिय साहित्य पुरस्कार २०८० बाट सुनसरीकी कुन्ता शर्मा, गीत संगितको माध्यमबाट योगदान गरेको भन्दै भीम विराग राष्ट्रिय संगीत पुरस्कार २०८० बाट मकवानपुरका लाल श्रेष्ठ, कला पुरस्कारमा योगदान पु¥याएको भन्दै भीम विराग राष्ट्रिय कला पुरस्कार २०८० बाट मकवानपुरका कलाकार बीएस राना र पत्रकारिताका क्षेत्रबाट साहित्य कला तथा संगितमा योगदान गरेको भन्दै भीम विराग राष्ट्रिय पत्रकारिता पुरस्कार २०८० बाट ललितपुरका जयदेव भट्टराईलाई पुरस्कृत गरेको हो । भट्टराई मधुपर्कका पूर्वसम्पादक समेत हुन् । उनीहरुलाई जनही २५ हजार रुपैयाँसहित पुरस्कृत गरेको हो ।
त्यस्तै प्रतिष्ठानले तुलसीमाया–शिवकुमारी सृजनशील नारी सम्मानबाट १५ हजार रुपैयाँ सहित मञ्जु खराल, शिला नारी पुरस्कार १५ हजार रुपैयाँसहित निरु मगर र २० हजार रुपैयाँको रामकृष्ण बानियाँ स्मृति लोक संगीत पुरस्कार पम्फा थापा मगरलाई प्रदान गरेको छ ।
त्यस्तै १० हजार रुपैयाँ राशीको मंगलादेवी स्मृति स्वास्थ्य सेवा पुरस्कार सीमा मिश्र र अजित सेन गुप्ता भिन्न क्षमता पुरस्कार बाराकी अञ्जु धिताललाई प्रदान गरिएको छ । कार्यक्रममा हेटौंडा उपमहानगरपालिकाका प्रमुख मिनाकुमारी लामा, प्रतिष्ठानका अध्यक्ष केशवलाल श्रेष्ठ तौजलले लगाएतले सम्मान तथा पुरस्कार वितरण गरेका थिए ।