बागमती विश्वविद्यालयको सम्पर्क कार्यालय स्थापना

२४ बैशाख, हेटौंडा । प्रदेशको आफ्नै विश्वविद्यालय स्थापनाको क्रममा बागमती प्रदेश सरकारले सोमबार बागमती विश्वविद्यालयको सम्पर्क कार्यालय स्थापना गरेको छ ।
हेटौँडा उपमहानगरपालिका वडा नम्बर ७ मा रहेको प्रदेश शिक्षा निर्देशनालयको भवनमा स्थापना गरिएको सम्पर्क कार्यलयको प्रदेशका मुख्यमन्त्री शालिकराम जम्कट्टेलले उद्घाटन गरेका छन् ।उनले प्रदेशमा स्थापना हुने सार्वजनिक विश्वविद्यालयले प्राविधिक र व्यावसायिक शिक्षालाई जोड दिने बताए । विश्वविद्यालयको स्थापनाले शैक्षिक बेरोजगार उत्पादन न्यूनीकरणमा टेवा पुग्ने उनले विश्वास व्यक्त गरे । 
मुख्यमन्त्री जम्कट्टेलले प्रदेश सरकारले विश्वविद्यालयलाई व्यवस्थित र स्थायित्व दिन नयाँ मोडलमा ऐन बनाएको उल्लेख गर्दै बागमती विश्वविद्यालयमा बोर्ड अफ ट्रष्टीको व्यवस्था गरिएको जानकारी दिए । उनले बागमती विश्वविद्यालयलाई स्वायत्त मोडलमा अघि बढेको दावी पनि गरे । 
कार्यक्रममा पूर्वमुख्यमन्त्री डोरमणी पौडेलले नेपालमा शिक्षाको गुणस्तर खस्किएकोले त्यसलाई बागमती विश्वविद्यालयले परिपूर्ति गर्नुपर्ने बताए । उनले शिक्षाका लागी बिदेशिने परम्परा बढेको तर्फ सबैजना सचेत रहनुपर्ने उल्लेख गर्दै प्रदेश विश्वविद्यालयले व्यवहारिक र प्राविधिक शिक्षा दिन सके विदेशिन क्रमलाई रोक्न सकिने बताए । 
प्रदेशका सामाजिक विकास मन्त्री कुमारी मोक्तानको अध्यक्षतामा भएको कार्यक्रममा मुख्यमन्त्री जम्कट्टेलले सामाजिक विकास मन्त्रालयका सचिव भुसाललाई बोर्ड अफ ट्रष्टिजको प्रमाणपत्र प्रदान गरेका थिए । बोर्ड अफ ट्रष्टिजको प्रमाणपत्र प्रदान गरेसँगै बागमती प्रदेश विश्वविद्यालय स्थापना र सञ्चालनका लागि थप प्रक्रिया अगाडि बढाउन बाटो खुलेको छ । 
प्रदेश उच्च शिक्षा ऐन २०७८ मा भएको व्यवस्था अनुसार सार्वजनिक विश्वविद्यालयको सञ्चालन र व्यवस्थापनका लागि तयार गरिएको विधानमा विश्वविद्यालय सभा, विश्वविद्यालय संरक्षक समिति (बोर्ड अफ ट्रष्टिज), प्राज्ञिक परिषद्, कार्यकारी परिषद् र सेवा आयोग गठनको व्यवस्था गरिएको छ ।