प्रदेश सभा बैठकमा नीति तथा कार्यक्रमको सिद्धान्त र प्राथमिकता पेश हुने

१ जेठ, हेटौंडा । बागमती प्रदेश सभाको आज दिउँसो ३ बजे बस्ने बैठकमा प्रदेश सरकारको आगामी आर्थिक वर्ष २०८१÷०८२ को नीति तथा कार्यक्रमको सिद्धान्त र प्राथमिकता पेश हुने भएको छ ।
बागमती प्रदेश सभा सचिवालयका प्रवक्ता मनोज गुप्ताले आजको बैठकमा सरकारको आगामी आर्थिक वर्ष २०८१÷०८२ को नीति तथा कार्यक्रमको सिद्धान्त र प्राथमिकता पेश हुने गर्ने कार्य सुचि रहेको जानकार दिए ।
यसअघि आज दिउँसो १ बजे बस्ने कार्यव्यवस्था परामर्श समितिको बैठकले प्रदेश सभा बैठकको कार्यसूचिहरु निर्धारण गर्नेछ । सचिवालयका प्रवक्ता गुप्ताले सोही बैठकले आज ३ बजे बस्ने बैठकको कार्य सूचीलाई अन्तिम रुप दिने बताए । 
यस्तै आजकै बैठकले संसदीय समितिको सभापतिको निर्वाचनको विषयमा पनि टुंगो लगाउने प्रवक्ता गुप्ताले जानकारी दिए । उनका अनुसार दलहरूबिच यहि ४ गते संसदीय समितिको सभापतिको निर्वाचन गर्ने सहमति भएको छ । प्रवक्ता गुप्ताका अनुसार संसदमा पेश हुने सिद्धान्त र प्राथमिकतामाथि भने अर्को बैठकबाट छलफल हुनेछ । 
यसअघि हिजो सोमबारबाट सुरु भएको प्रदेश सभाको चौथो अधिवेशनको पहिलो बैठकमा संसदमा प्रतिनिधित्व गर्ने दलका नेता तथा सचेतकहरुले शुभकामना व्यक्त गरेका थिए ।