चलचित्र पत्रकार संघ मकवानपुरले पत्रकार र कलाकर्मीलाई सम्मान गर्ने

२ जेठ, हेटौंडा । चलचित्र पत्रकार संघ मकवानपुरले चलचित्र पत्रकारिता दिवसमा पत्रकार र कलाकर्मीलाई सम्मान गर्ने भएको छ ।
जेठ ७ गते मनाईने दिवसको अवसरमा प्रदान गरिंदै आएको राष्ट्रिय चलचित्र पत्रकारिता पुरस्कार २०८१ चलचित्र पत्रकार गीता अधिकारीलाई प्रदान गरिने भएको छ । अधिकारीलाई चलचित्र निर्माता एवं वितरक नरेन्द्र महर्जनले स्थापना गरेको 'नन्दबहादुर महर्जन स्मृति राष्ट्रिय चलचित्र पत्रकारिता पुरस्कार' बाट सम्मानित गरिंदैछ । उनी दुई दशकदेखि चलचित्र पत्रकारितामा सक्रिय छिन् । संघको पुर्व केन्द्रीय उपाध्यक्ष र गीतकारसमेत रहेकी अधिकारी हाल मिलास मासिक पत्रिकामा आवद्ध छिन् ।  
चलचित्र पत्रकारिता पुरस्कार २०८१ बाट पत्रकार बालकृष्ण अधिकारीलाई प्रदान गर्ने भएको छ । हेटौंडाबाट कान्तिपुर टेलिभिजनका लागि पत्रकारिता गरिरहेका अधिकारी चलचित्र पत्रकार संघ मकवानपुर शाखाका संस्थापक सहसचिव समेत हुन् । 
संघले कलाकर्मी सम्मान २०८१ बाट गायक तथा कलाकार कोशिस क्षेत्रीलाई प्रदान गर्ने भएको छ । मकवानपुरमा जन्मिएर जिल्लाको नाम राख्दै राष्ट्रिय स्तरको कलाक्षेत्रमा सक्रिय रहेकाहरुलाई यस विधामा सम्मान गर्दै आइरहेको छ । 
संघको कार्यसमिति बैठकले जेठ १० गते हेटौंडामा हुने कार्यक्रममा पुरस्कार तथा सम्मान गर्ने निर्णय गरेको चलचित्र पत्रकार संघ मकवानपुरका अध्यक्ष कपिल खड्काले बताए ।