हेटौंडालाई स्थायी मुकाम बन्न कसैले रोक्न सक्दैनः बानियाँ

८ माघ, हेटौँडा । पूर्व गृहराज्य मन्त्री एवम् प्रदेशसभा सदस्य इन्द्रबहादुर बानियाँले हेटौंडा ३ नम्बर प्रदेशको स्थायी राजधानी बन्ने दावी गरेका छन् । नारायणी यातायात व्यवसायी संघ तथा उद्योग संघका नवनिर्वाचित कार्यसमितिलाई निर्माण व्यवसायी संघ मकवानपुरले गरेको स्वागत एवम् सम्मान कार्यक्रममा बोल्दै बानियाँले हेटौंडालाई ३ नम्बर प्रदेशको स्थायी राजधानी हुन कसैले रोक्न नसक्ने दावी गरेका हुन् ।
सरकारले यसलाई अस्थायी मुकाम तोकेर सही निर्णय गरेको भन्दै मध्यमाञ्चल क्षेत्रको प्रायः सबै क्षेत्रिय कार्यालयहरु रहेको हेटौंडा ३ नम्बर प्रदेशको स्थायी राजधानीको लागी उपयुक्त रहेको दावी गरे । फास्ट ट्रयाक र धरान चतरा मार्ग बनेपछि ३ नम्बर प्रदेशका सबै जिल्लालाई हेटौंडा आउन सहज हुने दावी गर्दै उनले यी दुवै संरचना छिटो निर्माणको लागि झक्झक्याउनुपर्ने सुझाव दिए ।
हेटौंडालाई प्रदेशको स्थायी मुकाम बनाउनको लागि अन्य जिल्लाका सांसद्हरुसंग सल्लाह गरिरहेको जानकारी दिँदै उनले काँग्रेसबाट निर्वाचित सबै प्रदेश सांसद्हरु सकारात्मक रहेको दावी समेत गरे ।
मकवानपुरबाट प्रदेशको मुकाम अन्त लैजान खोजे आन्दोलन गर्ने चेतावनी दिँदै बानियाँले त्यसको लागि आवश्यक सहयोग गर्न मकवानपुरका सबै संघ संस्थाहरुलाई आग्रह समेत गरे ।
कार्यक्रममा निर्माण व्यवसायी संघ मकवानपुर अध्यक्ष आनन्दराम पराजुलीले जिल्लामा रहेका व्यवसायिक संस्थाको बीचमा सुमधुर र व्यवसायिक सम्बन्ध हुनुपर्नेमा जोड दिए । यस्तै नारायणी यातायातका अध्यक्ष हिरालाल श्रेष्ठ, उद्योग संघका अध्यक्ष नवराज अर्यालले मकवानपुरको विकासको लागि व्यवसायिक संस्थाको बीचमा एकता र सुमधुर सम्बन्ध आवश्यक रहेको धारणा राखे ।
केही समयअघि भएको नारायणी यातायात र उद्योग संघका नयाँ निर्वाचित कार्यसमितिलाई निर्माण व्यवसायी संघले एक कार्यक्रमकाबीच बधाई तथा शुभकामना दिएको हो ।