खोकनामा भएको चोरीमा संलग्न ६ जना पक्राउ

५ जेठ, ललितपुर । ललितपुर महानगरपालिका–१२ खोकनामा भएको चोरीमा संलग्न ६ जनालाई प्रहरीले पक्राउ गरेको छ ।
पक्राउ पर्नेमा रामेछाप दोरम्बा गाउँपालिका–४ घर भई ललितपुर महानगरपालिका-१५ खुमलटार बस्ने ३७ वर्षीय कमल थापा मगर र ३५ वर्षीय धनलाल थापा मगरको संलग्ना पुष्टि भएको थियो । कार्यालयको टोलीले कमललाई जेठ ३ गते रामेछापको दोरम्बा गाउँपालिका–४ र धनलाललाई भैँसेपाटीबाट चोरीका सामानसहित पक्राउ गरेको काठमाडौँ उपत्यका अपराध अनुसन्धान कार्यालयका प्रहरी उपरीक्षक रवीन्द्र रेग्मीले जानकारी दिए ।
त्यस्तै, गरगहना खरिद गर्ने सिन्धुपाल्चोक घर भई हाल काठमाडौँको बूढानीलकण्ठ नगरपालिका–११ कपन बस्ने २८ वर्षीय सुवास सुनार र कागेश्वरी मनोहरा नगरपालिका–६ मुलपानीमा सुनचाँदी पसल सञ्चालन गर्ने ४१ वर्षीय रमेश विक, चोरी गरेको आईफोन किनबेच गर्ने ताम्राकार कम्प्लेक्सस्थित सेल फोन रेस्क्यू सेन्टरका सञ्चालक ४१ वर्षीय योगेश डाँगी र २२ वर्षीय मोहम्मद समीर पनि प्रहरीले पक्राउ गरेको छ । उनीहरूलाई अनुसन्धानका लागि जिल्ला प्रहरी परिसर ललितपुर पठाइएको छ ।
वैशाख ७ गतेदेखि ९ गतेको बिचमा नवराज गुरुङको घरमा कोही नभएको समयमा सुनचाँदीका गरगहनाहरू तथा आईफोन लगायतका सामान चोरी भएको थियो । 
प्रहरीले सुनको सिक्रि १ थान, रातो रङ्गको क्रिष्टलजडित सुन १ थान, बिभिन्न रंगका क्रिष्टलजडित सुनको रानीहार २ थान, बिभिन्न रङ्गका क्रिष्टल जडित सुनको चोक्कर ५ थान, बिभिन्न रङ्गका क्रिष्टल जडित सुनको पेण्डल ४ थान, बिभिन्न रङ्गका क्रिष्टल जडित सुनको चन्द्रहार ४ थान, रातो रङ्गको पोते जडित सुनको लकेट १ थान, रातो रङ्गको पोते जडित सुनको पाँचगेडि १ थान, रातो क्रिष्टल जडित सुनको चन्द्रमा १ थान, सुनको सानो ठूलो तिल्हरी ३ थान, सुनको चन्द्रमा २ थान, सुनको झुम्का २ थान, सुनको सानो झुम्का २ थान, सुनको टप २ थान, सुनको पत्थर जडित नथ्थि थान-२, चाँदीको पातलो पत्ता ३ थान, बिभिन्न दरका नेपाली नोटहरु गरी २४ हजार ४२० र रेडमी १२स्क्रिन टच मोबाईल १ थान बरामद गरेको छ ।