बागमतीमा संसदीय समितिको संख्या ६ पुग्यो

६ जेठ, हेटौँडा । यसअघि बागमती प्रदेश सभामा दलहरुबीच संसदीय समितिको सभापतिको नेतृत्वको विषयलाई लिएर सहमती हुन नसकेपछि प्रदेश सभामा एउटा समिति थप्ने सहमती भएको थियो । सोही अनुसार शनिवार दिउँसो बसेको बागमती प्रदेश सभाको बैठकले प्रदेशमा प्रदेश विशेषाधिकार समिति गठन गरेको छ । यससँगै बागमती प्रदेश सभामा समितिको संख्या ६ पुगेको छ ।
प्रदेश सभा बैठकमा माओवादी केन्द्रका मुख्यम सचेतक रत्न प्रसाद ढकालले नेपालको संविधानको धारा १९३ तथा प्रदेश सभा नियमावली २०७४ को नियम १६७ को उपनियम १ बमोजिम विशेषाधिकार समिति गठन गर्न बैठकमा गरेको प्रस्तावलाई निर्णायार्थ प्रस्तुत गर्दा प्रस्ताव गरेका थिए । 
उनको प्रस्तावमा कांग्रेसका प्रमुख सचेतक गोविन्द लम्साल, एमालेका मधुसुदन पौडेल, राप्रपाकाकी कुमारी तामाङ र एकीकृत समाजवादीका कृष्ण प्रसाद शर्मा खनालले समर्थन गरेका थिए । यस्तै प्रदेश सभाका सभामुख भुवन पाठकले विशेषाधिकार समितिको सदस्यहरुमा कृष्ण प्रसाद शर्मा खनाल, कृष्ण प्रसाद सिलवाल, विरबहादुर तामाङ, गोविन्द लम्साल, जयराम थापा, देवेन्द्र श्रेष्ठ, धनेश्वरी प्रजापति, प्रभात तामाङ, बिन्दु श्रेष्ठ, मायादेवी शर्मा, रत्नप्रसाद ढकाल, राजु विष्ट, रामकृष्ण चित्रकार, सुश्पा भुजेल न्यौपाने, सरिता खड्गी, सुना परियार, सुरेन्द्रराज गोसाईँको नाम प्रस्ताव गरेकोमा बैठकले सर्वसम्मत अनुमोदन गरको थियो ।
यसैगरी बैठकमा सभामुख पाठकले प्रदेश सभा नियमावली २०७४ को नियम १५० बमोजिम प्रदेश मामिला समितिमा रहेका आनन्द श्रेष्ठ र उद्योग पर्यटन तथा वातावरण समितिमा रहेका प्रेमभक्त महर्जनलाई हेरफेर गर्न गरेको प्रस्ताव पनि बैठकले अनुमोदन गरेको छ । यससँगै शनिवारको प्रदेश सभा बैठक आइतबार बिहान ११ बजे बस्नेगरी स्थगित भएको छ ।