बागमतीमा ४ वटा समितिले पाए नेतृत्व

६ जेठ, हेटौँडा । बागमती प्रदेश सभाको दोस्रो कार्यकाल सुरु भएको झण्डै पन्ध्र महिनापछि ४ वटा संसदीय समितिहरुले नेतृत्व पाएका छन् । प्रदेश सभामा रहेका ६ मध्ये ४ वटा संसदीय समितिहरुले शनिवार सभापति पाएका हुन् । 
शनिवार भएको निर्वाचन प्रकृयाबाट प्रदेश मामिला समितिको सभापतिमा कांग्रेसका छिरिङ दोर्जे लामा, सार्वजनिक लेखा समितिको सभापतिमा कांग्रेस कै श्रीराम लामिछाने, अर्थ तथा विकास समितिको सभापतिमा राप्रपाका नुरज बज्राचार्य र शिक्षा स्वास्थ्य तथा कृषि समितिमा माओवादी केन्द्रका ठाकुर ढकाल चयन भएका छन् ।
शनिवार दिउँसो बसेका संसदीय समितिहरुको बैठकबाट साभपतिहरु सर्वसम्मत चयन गरिएको प्रदेश सभा सचिवालयका प्रवक्ता मनोज गुप्ताले जानकारी दिए । यसअघि बिहीबार नै दलहरु बिच कांग्रेसले दुई तथा एमाले, माओवादी केन्द्र, राप्रपा र एकीकृत समाजवादीले एक÷एकवटा समितिको सभापति लिने सहमती भएको थियो । 
सोही अनुसार शनिवार भएको निर्वाचन प्रकृयाबाट चारवटा समितिमा सभापति सर्वसम्मत भएका हुन् । निर्वाचन तालिका अनुसार शुक्रबार नै ती समितिहरुमा एक÷एकजनाको मात्रै उम्मेदवारी परेको थियो । सम्पूर्ण निर्वाचन प्रक्रिया पुरा गरेपछि समितिका ज्येष्ठ सदस्यहरुले निर्वाचित भएका सभापतिको नाम घोषणा गरेका थिए । 
प्रदेश सभामा बाँकी रहेका दुईवटा सममितिको सभापतिको लागी भने ७ जेठमा निर्वाचन हुने भएको छ । बागमति प्रदेश सभा सचिवालयका सचिव कृष्णहरी खड्काले उद्योग पर्यटन तथा वातावरण समिति र प्रदेश विशेषाधिकार समितिको सभापतिको लागि ७ जेठमा निर्वाचन हुने जानकारी दिए । त्यसका लागी प्रदेश साभा सचिवालयले निर्वाचन कार्यतालिका समेत सार्वजनिक गरेको छ ।