खाग खरिदबिक्रीमा संलग्न ६ जना पक्राउ

सांकेतिक तस्विर

८ जेठ, चितवन । चितवन राष्ट्रिय निकुञ्जले गैँडाको खाग खरिदबिक्रीमा संलग्न रहेको अभियोगमा ६ जनालाई पक्राउ गरेको छ । 
पक्राउ पर्नेमा नवलपरासीको (बर्दघाट सुस्तापूर्व)को कावासोती नगरपालिका-१६ बस्ने २९ वर्षीय क्रान्ति खड्का, ३८ वर्षीय लेखनाथ सुनार, कावासोती-१५ का ५० वर्षीय छविलाल परियार, ३६ वर्षीय प्रकाश घिमिरे, बुलिङटार गाउँपालिका-४ का ३५ वर्षीय खिमबहादुर बराल र बझाङको छबीसपाथिभरा गाउँपालिका-१ बस्ने २७ वर्षीय प्रकाशराज जोशी रहेका छन् । एकजना फरार छन् ।
प्रहरीले खड्काको साथबाट एक थान एकसिङ्गे गैँडाको खाग फेला परेको प्रमुख संरक्षण अधिकृत डिलबहादुर पुर्जा पुनले पत्रकार सम्मेलनमा जानकारी दिए । उनका अनुसार यो खाग २०७२ साल चैतमा चितवन राष्ट्रिय निकुञ्जको अमलटारी क्षेत्रअन्तर्गतको गुन्द्रेढाकाहा मध्यवर्ती सामुदायिक वनमा फेला परेको थियो । 
उनका अनुसार पक्राउ परेका छविलाल परियार र कावासोती नगरपालिका-१५ का भैरव थापाले घाँस दाउरा काट्न जाँदा वन क्षेत्रमा एकसिङ्गे गैँडा मरी सडिगलेको अवस्थामा देखेपछि दुई जना मिलेर मृत गैँडाको खाग चोरी गरेको अनुसन्धानबाट खुलेको छ । थापाको भने मृत्यु भइसकेको प्रहरीले जनाएको छ ।