विश्व बुवाआमा दिवसमा जेष्ठ नागरिकलाई निमोनिया विरुद्धको खोप

२० जेठ, हेटौंडा । विश्व बुवाआमा दिवसको अवसरमा हेटौँडामा ५४ जना जेष्ठ नागरिकलाई शनिबार निमोनिया विरुद्धको खोप लगाइएको छ । यस्तै उक्त अवसरमा ८४ वर्षदेखि १०३ वर्ष उमेरसम्मका २ सयजना ज्येष्ठ नागरिकहरुलाई थर्मस पनि वितरण गरिएको छ । 
हेटौँडा उपमहानगरपालिका वडा नम्बर २ को आर्थिक सहयोगमा निर्माण भएको जेष्ठ नागरिक सेवा केन्द्र शुभारम्भ गर्ने क्रममा जलेश्वर मन्दिर व्यवस्थापन समितिको व्यवस्थापनमा निमोनिया विरुद्धको खोप लगाइएको हो । हेटौँडा २ का वडा अध्यक्ष बिष्णु गोपाल महर्जनले पहिलो चरणमा सीमित बजेटका कारण ५४ जनालाई मात्रै नोमोनिया विरुद्धको खोप लगाएको जानकारी दिँदै वडा आगामी वर्षको बजेटमा वडाका बाँकी जेष्ठ नागरिकलाई खोप कार्यक्रममा समेट्ने जानकारी दिए ।
वडा अध्यक्ष महर्जनका अनुसार शनिवार आयोजित कार्यक्रमका अवसमार वडामा रहेका जेष्ठ नागरिकहरुको सुगर, प्रेसर र अन्य स्वास्थ्यसँग सम्बन्धित निशुल्क जाँच समेत गरिएको छ । बागमती प्रदेश सरकारको सामाजिक विकास मन्त्री कुमारी मुक्तानले दिवा सेवा केन्द्रको शुभारम्भ गरेकी हुन् । उनले सेवा केन्द्रले जेष्ठ नागरिकहरुका लागी आफ्ना दौतरीहरुसँग भेटघाट गर्ने र सुखदुःख साटासाट गर्न सहजता प्रदान गर्ने विश्वास व्यक्त गरिन् । 
कार्यक्रममा हेटौँडा उपमहानगरपालिका उप प्रमुख राजेश कुमार बनियाँले जेष्ठ नागरिकको अनुभव, ज्ञान र सीप युवा पुस्ताले ग्रहण गर्नुपर्नेमा जोड दिए । उनले जेष्ठ सदस्यहरु जिउँदा इतिहास भएको उल्लेख गर्दै नयाँ पुस्ताले उहाँहरुबाट धेरैकुरा सिक्न सक्ने बताए । 
कार्यक्रममा ज्येष्ठ नागरिक जिल्ला संघ मकवानपुर अध्यक्ष हरि प्रसाद सिग्देल, ज्येष्ठ नागरिक समाज मकवानपुर अध्यक्ष केदार न्यौपाने, जलेश्वर महादेव क्षेत्र विकास समिति अध्यक्ष मुरारी सुवेदी, वनस्खण्डी देवी सामुदायिक वन समिति अध्यक्ष भवसागर श्रेष्ठ, हेटौँडा २ का वडा सदस्य सुरज बतौँला लगायतले राज्यले जेष्ठ सदस्यहरुलाई समाजमा सम्मानित जिवन यापनको वातावरण तयार गर्न नीति नै बनाएर अगाडी बढ्नपर्ने भन्दै सुझाव दिएका थिए ।