पदमुक्त प्रदेशसभा सदस्य देवकोटाद्वारा सर्वोेच्चमा रिट

६ असार, हेटौंडा । प्रदेशसभाबाट पदमुक्त गण्डकीका प्रदेशसभा सदस्य फणिन्द्र देवकोटाले सर्वोेच्चमा रिट दायर गरेका छन् ।
नेकपा माओवादी केन्द्रले कारबाही गरेपछि पदमुक्त भएका देवकोटाले बिहिबार रिट दायर गरेका हुन् । रिटमा कारबाही असंवैधानिक भएकाले खारेजी र आफ्नो पुर्नवहाली को माग गरिएको छ । रिटको पेशी आइतबारका लागि तोकिएको छ ।
माओवादीको चिह्न लिएर गोरखा–२ को प्रदेशसभा  (क) बाट निर्वाचित नेपाल समाजवादी पार्टी (नेसपा) पार्टीबाट आफु चुनाव लडेकाले माओवादीले कारबाही गर्न नमिल्ने उनको दावी छ ।
माओवादी केन्द्रले आफ्ना सांसदलाई ह्विप लगाएकोमा जेठ २८ गते मुख्यमन्त्री सुरेन्द्रराज पाण्डेलाई देवकोटाले फ्लोर क्रस गरेर विश्वासको मत दिएका थिए ।  मुख्यमन्त्री पाण्डेको पक्षमा मत दिएपछि माओवादीले उनलाई २४ घण्टे स्पष्टीकरण सोधेकोमा स्पष्टीकरण चित्तबुझ्दो नभएको भन्दै माओवादीले दल त्याग गरेको सूचनासहित कारबाहीको पत्र जेठ ३२ मा संसद सचिवालयमा पठाएको थियो । 
प्रदेश सभाको बैठकमा सभामुख कृष्णप्रसाद धितालले माओवादी केन्द्र गण्डकी प्रदेश संसदीय दलको कार्यालयबाट राजनीतिक दल सम्बन्धी ऐन, २०७३ को दफा ३४ अन्तर्गत दल त्याग सूचना प्राप्त भएको जानकारी गराएसँगै उनी पदमुक्त भएका थिए ।