हेटौँडामा चेतन कार्की र कोमल वली सम्मानित

१५ माघ, हेटौँडा । एकलाख रुपैँया राशीको बिजुलीमाया वनः श्रेष्ठ राष्ट्रिय संगीत पुरस्कारबाट भाषा, संगीत, साहित्य कला एंव सस्कृतिविद चेतन कार्कीलाई सम्मान गरिएको छ । 
भीम विराग संगीत साहित्य कला प्रतिष्ठान नेपालले हेटौँडामा कार्कीलाई सम्मान गरेको हो । कार्यक्रममा २० हजार राशीको विजय बानियाँ स्मृति लोक संगीत पुरस्कार लोक गायिका कोमल वलीलाई प्रदान गरिएको छ । प्रतिष्ठानले तुलसीमाया शिवकुमारी सृजनशील नारी पुरस्कार मकवानपुरकी साहित्यकार अनिता न्यौपाने, भीम मथुरा बाल प्रतिभा पुरस्कारबाट हेटौडाका चिराग डंगोल, शीला नारी संगीत पुरस्कारबाट हेटौंडाकी गायिका विद्या तिवारी, हर्षनर बज्राचार्य स्मृति पुरस्कारबाट नाट्यकर्मी कुमार शाहलाई सम्मान गरिएको छ । 
यस्तै मकवानपुरे साहित्यकार निमेष निखिललाई चिनु कुमारी लामा स्मृति साहित्य पुरस्कार र स्वास्थ्य क्षेत्रमा लामो समय स्वंयमसेवीको कार्य गर्नुभएकी चम्पा कोजुलाई प्रतिष्ठानले मङ्गलादेवी श्रेष्ठ स्मृति स्वास्थ्य पुरस्कारबाट सम्मान गरेको छ । गायक, संगीतकार तथा गीतकार जगत मर्दन थापाले सम्मान गरेका थिए । कार्यक्रममा प्रतिष्ठानका निवर्तमान अध्यक्ष तुल्सी थापा, साहित्यकार प्रकाश सायमी लगायतले मन्तव्य व्यक्त गरेका थिए । 
वरिष्ठ संगीत साधक, कवि एवं गीतकार भीम विराग जन्मजयन्तीको अवसरमा प्रतिष्ठानले विभिन्न क्षेत्रका व्यक्तित्वहरुलाई सम्मान गर्दै आइरहेको प्रतिष्ठानका अध्यक्ष उज्वल शर्मा भण्डारीले बताए ।