भोलीको प्रदेश बैठकमा पत्रकारलाई यस्तो व्यवस्था

१७ माघ, हेटौँडा । ३ नम्बर प्रदेशको प्रदेशसभा भोली विहिबार हेटौँडामा बस्दैछ । प्रदेशसभा सचिवालय रहेको मध्यमाञ्चल क्षेत्रीय शिक्षा निर्देशनालयमा बैठक बस्ने भएको हो ।

बैठक दिउसो १ बजेका लागि बोलाईएको प्रदेशसभा सचिवालयका प्रमुख डा. रोजराज पाण्डेले बताए । बैठकमा यसपटकदेखि निकै कडाई गरिने भएको छ । यसपटकको बैठकदेखि मार्यादापालक समेत रहनेछन् । तीनले सभालाई व्यवस्थित गर्नेछन् । बैठकमा समाचार संकलन गर्न जाने पत्रकारलाई पनि अबदेखि केही व्यवस्थित गरिएको छ । विहिबारको बैठकका लागि दिउसो १२ बजे उपस्थित हुन संचारकर्मीलाई आग्रह गरिएको छ । संचारकर्मीलाई भित्र छुट्टै स्थानमा बस्ने व्यवस्था गरिएको छ । त्यो स्थानमा बस्ने संचारकर्मीले तस्विर वा भिडियो लिन पाउने छैन, रिपोर्टिङ मात्रै गर्न पाउनेछन् ।

पाण्डेले संसद भवन निकै साघुरो भएका कारण २० जना संचारकर्मीहरु मात्र भित्र बसेर रिपोटिङ गर्न सक्ने बताएका छन् । टेलिभिजन र रेडियोका संचारकर्मीहरुका लागि दृष्य र श्रव्य प्रदेश सचिवालयले उपलव्ध गराउने जानकारी दिईएको छ । त्यसैगरी पत्रिकामा काम गर्ने संचारकर्मीहरुले भने भित्र गएर फोटो खिच्ने बित्तीकै बाहिर आउनुपर्नेछ । बाहिर बस्नुपर्ने संचारकर्मीले प्रोजेक्टरमा हेरेर समाचार संकलन गर्न सक्ने ब्यबस्था मिलाइएको पाण्डेले जानकारी गराएका छन् । रिपोटिङमा एउटा संचार माध्यमबाट एक जना संचारकर्मी आफ्ना संचार माध्यमको परिचयपत्र लिएर मात्र आउनुपर्ने व्यवस्था गरिएको छ ।

२० जना भित्र छिर्ने र बसिरहने संचारकर्मीका लागि संसद सचिवालयको पास उपलब्ध गराउने जनाईएको छ ।