यस्तो छ ३ नम्बर प्रदेशको पहिलो बैठकको कार्यसूचि

१८ माघ, हेटौँडा । ३ नम्बर प्रदेशको प्रदेशसभाको पहिलो बैठक आज बस्दैछ । प्रदेश प्रमुख अनुराधा कोइरालाले आज दिउँसो १ बजेका लागि बैठक आव्हान गरेकी हुन् ।

प्रदेश सचिवालय हेटौँडामा बस्ने पहिलो बैठकमा ५ वटा कार्यसूचि तय गरिएको छ । बैठकमा सभामुखले प्रदेशप्रमुखबाट प्राप्त अधिवेशन आव्हानसम्बन्धी पत्र बढेर सुनाउने पहिलो कार्यसूचि छ । त्यसपछि प्रदेशसभामा प्रतिनिधित्व गर्ने दलका प्रतिनिधिले आप्mनो मन्तव्य दिनुहुनेछ । तेस्रो कार्यसूचिमा प्रदेश नम्बर ३ को प्रदेशसभा कार्य सञ्चालन अन्तरिम कार्यविधि २०७४ पारित गरिनेछ । 

चौथोमा कार्यविधि बमोजिम सभामुखको अनुपस्थितिमा बैठकको अध्यक्षता गर्न सदस्यहरुको मनोनयन सभामुखले गर्ने र अन्तिम कार्यसूचिमा प्रदेश सभामुखको निर्वाचनको लागि मिति तोक्ने रहेको ३ नम्बर प्रदेश सचिवालयका सचिव डा. रोजनाथ पाण्डेले जानकारी दिए । बैठकको तयारी पुरा भएको बताउँदै पाण्डेले ७ वटा प्रदेशमध्ये यो पहिलो बैठक भएकोले विशेष चासो रहेको जिकिर गरे ।

अन्य प्रदेशलाई समेत सन्देश दिने ढंगले तयारी गरिएको उनको भनाई छ । सुरक्षा व्यवस्था समेत कडा पारिएको छ । मर्यादा पालक, बम डिस्फोजल टोली र सुरक्षाकर्मीको टोलीले सचिवालयको सुरक्षा दिनेछ ।