डिनालाई दिईयो संसदीय दल गठनको जिम्मा

१८ माघ, हेटौँडा । नेपाली कांग्रेसले ३ नम्बर प्रदेशको संसदीय दल गठनको जिम्मेवारी केन्द्रीय सदस्य महालक्ष्मी उपाध्याय डिनालाई दिएको छ । प्रधानमन्त्री निवास बालुवाटारमा विहिबार बसेको पदाधिकारी बैठकले डिनालाई संसदीय दल गठनको जिम्मेवारी दिएको हो ।
पदाधिकारीको बैठकले सातवटै प्रदेशमा संसदीय दल गठनका लागि प्रतिनिधि खटाउने क्रममा ३ नम्बर प्रदेशमा डिनालाई जिम्मेवारी दिएको प्रवक्ता विश्वप्रकाश शर्माले बताए । बैठकले प्रदेश १ मा डा. मिनेन्द्र रिजाल, २ मा पूर्वमहामन्त्री विमलेन्द्र निधी, ४ मा गोविन्द भट्टराई, ५ मा बालकृष्ण खाँड, ६ मा हृदयराम थानी र ७ मा एनपी साउदलाई जिम्मेवारी दिएको छ । 
बैठकमा प्रधानमन्त्री एवं पार्टी सभापति शेरबहादुर देउवा, वरिष्ठ नेता रामचन्द्र पौडेल, महामन्त्री डा. शशांक कोइराला, कोषाध्यक्ष चित्रलेखा यादव, पूर्व महामन्त्री प्रकाशमान सिंह, कृष्णप्रसाद सिटौला, विमलेन्द्र निधि, पूर्व सहमहामन्त्री अर्जुननरसिंह केसी, डा. रामशरण महत र पूर्णबहादुर खड्काको थियो । 
कांग्रेस प्रमुख प्रतिपक्ष दलको रुपमा रहने करिव निश्चित भएको ३ नम्बर प्रदेशको संसदीय दलको नेताको रुपमा पूर्वगृहराज्यमन्त्री समेत रहेका कांग्रेस मकवानपुर सभापति ईन्द्रबहादुर बानियाँ बन्ने कांग्रेस बृत्तमा चर्चा छ ।