मकवानपुरगढी - ५ सिमलटारमा महायज्ञ उदघाटन

२५ साउन, हेटौंडा। मकवानपुरगढी गाउँपालिका वडा नम्बर ५ सिमलटारमा आजबाट श्रीमद्भागवत ज्ञान महायज्ञ सुरु भएको छ ।नाग पञ्चमीको अवसर पारेर  आयोजना गरिएको महायज्ञको मकवानपुर क्षेत्र नम्बर २ का सासंद तथा  सरकारका मुख्य सचेतक महेशकुमार बर्तौलाले समुद्घाटन गरेका हुन् । 

महायज्ञ मूल आयोजक समितिका अध्यक्ष नेत्रप्रसाद घिमिरेको सभाध्यक्षतामा भएको महायज्ञमा उदघाटन समारोहमा बोल्दै प्रमुख अतिथि बर्तौलाले  सिङ्गो मकवानपुरगढीलाई पर्यटन र धार्मिक क्षेत्र बनाउने पहल गरिने बताए । 

उदघाटन पुर्व जलेश्वरधाम क्षेत्रबाट जल लिएर सिमलटार, कालिवन धादिङ बजार क्षेत्र परिक्रममा गरि महायज्ञ परिसरसम्म कलशयात्रा गरिएको थियो । करिब २ सय महिला तथा पुरुषहरुले कलश यात्रामा सहभागिता रहेको कलशयात्रा उपसमितिका संयोजक बालकुमारी दुलालले बताइन् । कलश यात्रामा ब्रामण्ड बाजा र राधाकृष्ण खैजेडी समूहले आफ्नो प्रस्तुती दिएका थिए । 

कार्यक्रममा युवा पण्डित कपिलदेव भट्ट, वडा ५ का वडाध्यक्ष दिपेश दहाल, मकवानपुर गाउँपालिकाका निर्वतमान अध्यक्ष विदुर हुमागाई, मूल समारोहका वरिष्ठ उपाध्यक्ष प्रेमनिधि तिमल्सिना लगायतले महायज्ञ सफलता सहितको शुभकामना भनाई राखेका थिए । कार्यक्रममा उपकथा वाचक पण्डित डेगनाथ ढकाल, अग्नि आचार्य गुरु प्रकाश भट्ट, १००८ भागवत संकल्पक पण्डित श्यामसुन्दर आचार्य,  समाजसेवी चन्द्रप्रसाद दुलाल, ईन्द्रबहादुर बस्नेत, सिमलटार टोल विकास संस्थाका अध्यक्ष श्यामप्रसाद लामा, अस्थायी प्रहरी चौकी धादिङका प्रमुख गगेन्द्रप्रसाद कुर्मी लगायत विभिन्न व्यक्तित्वहरुको आतिथ्यता रहेको थियो । 

हिन्दुधर्मालम्बी र बौद्ध धर्मालम्बीको भगवानहरु महादेव र गौतम बुद्धको पुजाआजा गर्ने स्थान एकै क्षेत्रमा रहोस् भन्ने साझा उद्देश्यका साथ महायज्ञको आयोजना गरिएको मूल आयोजक समितिका अध्यक्ष नेत्रप्रसाद घिमिरेले बताए ।